सर्लाहीमा तस्करी कडाइ कि आन्तरिक मिलेमतो ? प्रहरी र राजनीतिक नेताबीच वादविवाद

सर्लाही । सर्लाहीमा पछिल्लो समय तस्करी नियन्त्रणका नाममा प्रहरीले जति सक्रियता देखाएको छ, त्यति नै ठूलो विवाद पनि चुलिँदै गएको छ ।

जिल्लामा तस्करीको नाममा निर्दोष नागरिकहरूलाई मुद्दामा फसाइने र असली तस्करहरूलाई जोगाइने आरोप प्रहरीले खेप्दै आएको छ । यही विषयलाई लिएर जिल्ला प्रहरी प्रमुख (एसपी) योगेन्द्र कुमार खड्का र जसपा नेपालका मधेश प्रदेश अध्यक्ष अशोक यादवबीच वादविवाद चर्किएको हो ।

अध्यक्ष यादवले प्रहरी प्रशासनमाथि खुलेर आरोप लगाउँदै आएका छन् । उनका अनुसार, सर्लाहीमा तस्करी नियन्त्रणभन्दा पनि निर्दोषहरूलाई फसाएर असली तस्करलाई जोगाउने प्रवृत्ति मौलाएको छ ।

‘यहाँ पैसा दिएर मुद्दा किनबेच हुन्छ, असली तस्कर खुलेआम घुम्छन्’ यादवले भनेका छन् । तर, एसपी खड्काले भने ती आरोपहरू अस्वीकार गर्दै कानुनभन्दा बाहिर कुनै दबाब नमानेको दाबी गरेका छन् ।

प्रहरीमाथि सार्वजनिक रुपमा प्रश्न उठ्ने अर्को पक्ष जिल्ला प्रहरी कार्यालयकै मुद्दा फाँट रहेको छ । मुद्दा फाँटका प्रहरी निरीक्षक बालिष्टर सिंहमाथि आर्थिक लेनदेनका आधारमा मुद्दा कमजोर बनाइदिने र झुटा मुद्दा लगाउने आरोपहरू सञ्चारमाध्यममार्फत सार्वजनिक भइसकेका छन् । तर, यस्ता गम्भीर आरोपहरूमाथि हालसम्म कुनै छानबिन नहुनुले प्रहरी नेतृत्वमाथि समेत प्रश्न उठेको छ ।

पाँच राजनीतिक दलहरू यस विषयमा आन्दोलित भइसकेका छन् । उनीहरूले संयुक्त रुपमा आन्दोलनको घोषणा समेत गरिसकेका छन् ।
अशोक यादव र एसपीबीच भएको वादविवाद पनि यही घटनाक्रमको कडी मानिएको छ ।

समस्या कहाँ छ ?

सर्लाहीमा वर्षौंदेखि तस्करीको जालो मजबुत छ । सीमावर्ती क्षेत्र भएकाले यहाँ साना व्यापारीदेखि उच्चस्तरीय तस्करहरू सक्रिय छन् । तर, प्रहरीमाथि लाग्ने आरोप भने झनै गम्भीर बन्दै गएको छ ।

पछिल्लो पटक सार्वजनिक भएको मुद्दा कारोबारको प्रकरणले प्रहरी संगठनभित्रै आर्थिक चलखेलको आभास दिएको छ । यसले प्रशासनिक स्वच्छतामाथि गम्भीर प्रश्न उठाएको छ ।

राजनीति र प्रहरीबीचको द्वन्द्व

सर्लाहीमा सुरक्षा र राजनीतिक नेतृत्वबीचको सम्बन्ध सहज रहँदैन भन्ने कुरा विगतका घटनाले पनि देखाउँदै आएका छन् ।

यसपटक भने कुरा झनै गम्भीर बनेको छ । जसपा नेता अशोक यादवजस्ता प्रदेशस्तरका नेताले खुलेआम प्रहरीमाथि आरोप लगाउनु र त्यसको प्रतिउत्तरमा प्रहरी प्रमुखले पनि कडा प्रतिक्रिया दिनुले तनाव नयाँ मोडमा पुगेको देखिन्छ ।

अब के हुन्छ ?

सर्लाहीको यो विवाद तत्काल साम्य हुने देखिँदैन ।

पाँच दलको आह्वानमा आन्दोलन घोषणा भइसकेको छ भने प्रहरी प्रशासनले पनि आफ्नो अडान छाड्न तयार छैन ।

स्थानीयबासीले भने वास्तविक तस्करी गर्नेमाथि कारबाही होस् र निर्दोषहरू सुरक्षित रहून् भन्ने चाहना राखेका छन् ।​