धनुषाबाट गएको ट्रकमा प्याजको आडमा कपडा तस्करी, सिन्धुलीमा बरामद

सिन्धुली । सिन्धुलीमा प्याजका बोराभित्र लुकाइछिपाइ राखिएको ठूलो परिमाणको बिलविहीन कपडा प्रहरीले बरामद गरेको छ ।

जिल्ला प्रहरी कार्यालय सिन्धुलीका अनुसार कमलामाई नगरपालिका–९ भिमानस्थित चेकपोष्टमा गरिएको सवारी साधन चेकजाँचका क्रममा उक्त अवैध कपडा फेलापरेको हो ।

बर्दीबासबाट काठमाडौँतर्फ जाँदै गरेको प्र.२–०४–००१ ख ००६१ नम्बरको प्याज लोड ट्रकलाई शंकाका आधारमा रोकी जाँच गर्दा भन्सार प्रक्रिया पूरा गरिएका प्याजका २ सय ३० बोरा मुनि लुकाइएका विभिन्न ब्रान्डका सूती कपडाका रोलहरू भेटिएको प्रहरीले जनाएको छ ।

बिहीबार बिहान करिब ९ बजे बीपी राजमार्गअन्तर्गतको भिमान चेकपोष्टमा इलाका प्रहरी कार्यालय भिमानबाट खटिएको टोलीले ट्रक नियन्त्रणमा लिएको थियो ।

जाँचका क्रममा ‘पुनित’, ‘डोनातेला’ र ‘बिमल’ कम्पनीका सूती सुट तथा सर्टका कपडा बरामद गरिएको हो । प्रहरीले सार्वजनिक गरेको विवरणअनुसार पुनित कम्पनीका ४९ रोल (९,८१० मिटर), डोनातेला कम्पनीका २० रोल (९,२७०।५५ मिटर) र बिमल कम्पनीका ३० रोल (९,३४०।६ मिटर) कपडा फेला परेका छन् । बरामद कपडाको अनुमानित मूल्य १६ लाख ८३ हजार ६४० रुपैयाँ रहेको छ ।

त्यसैगरी ट्रकमा लोड गरिएको प्याजको मूल्य ४ लाख ८० हजार रुपैयाँ र ट्रकको अनुमानित मूल्य २० लाख रुपैयाँ रहेको प्रहरीले जनाएको छ । यसअनुसार नियन्त्रणमा लिइएको सम्पूर्ण सामानको मूल्य ४१ लाख ६३ हजार ६४० रुपैयाँ पुगेको छ ।

केही बर्षयता तस्करीको स्वरुप फेरिएको छ । गाडीको माथि माथि प्याज, चामल जस्तै सामान राखी महंगा कपडा लगायतका सामान तस्करी हुँदैआएका छन् ।

यसैबीच, बरामद कपडा धनुषाबाट तस्करी गरी ल्याइएको र यसमा जिल्ला प्रहरी कार्यालय धनुषामा कार्यरत घुमुवा प्रहरीको संलग्नता रहेको व्यापारीक स्रोतले दाबी गरेका छन् । स्रोतका अनुसार चेकजाँच सहज गराइदिने आश्वासनमा यस्ता तस्करीका सामानहरू ढुवानी हुँदै आएका थिए । तर, यस विषयमा सम्बन्धित प्रहरी अधिकारीको आधिकारिक प्रतिक्रिया भने आएको छैन ।

प्रहरीले घटनाबारे थप अनुसन्धान भइरहेको जनाएको छ । तस्करीमा संलग्न व्यक्ति तथा सञ्जालको पहिचान गरी कानुनी कारबाही अघि बढाइने जिल्ला प्रहरी कार्यालय सिन्धुलीले जनाएको छ । यसअघि पनि धनुषामा घुमुवा प्रहरी तस्करी तथा लागुऔषध कारोबारीसँग साठगाँठ रहेको आरोपमा विवादमा पर्दै आएका छन् ।

केही दिनअघि ढल्केबरमा तस्करीको काजु बरामद गरिसकेपछि धनुषाका एसपी रुगमबहादुर कुँवरको आदेशमा तुरुन्तै छाडिएको स्रोतको दाबी छ–एसपीसँगै सेटिङ मिलेपछि उक्त काजु छाडिएको थियो ।