कर्मचारी र बिचौलिया १ लाख ८५ हजार घुससहित पक्राउ, कार्यालय प्रमुखको मोवाइल बरामद

भरतपुर । अख्तियार दुरुपयोग अनुसन्धान आयोगको टोलीले यातायात व्यवस्था कार्यालय, भरतपुर, चितवनका कार्यालय सहायक इन्द्रजित गुरुङ र बिचौलिया सुरज पाठकलाई प्रवेश परीक्षामा फेल भएका परीक्षार्थीहरुलाई पास गराउनका लागि १ लाख ८५ हजार घुस लिइसकेपछि नियन्त्रणमा लिएको छ ।

यातायात व्यवस्था कार्यालय, भरतपुर, चितवनका कार्यालय प्रमुख एवं कर्मचारीहरुले महालक्ष्मी ड्राइभिङ सेन्टर, गुरुङ ड्राइभिङ सेन्टर र कुमार ड्राइभिङ सेन्टर लगायतको मिलेमतोमा यातायात व्यवस्था कार्यालय भरतपुर, चितवनबाट संचालन भएको सवारी चालक अनुमतिपत्रको परीक्षा संचालन गर्दा फेल भएका परीक्षार्थीहरुबाट बिभिन्न वर्गका सवारी चालक अनुमतिपत्र दिनका लागि वर्ग अनुसारको १५ हजारदेखि २५ हजारसम्म रकम लिई पास गराउने गरेको उजुरीपछि अख्तियारले निगरानी गरेको थियो ।

निगरानीकै क्रममा सवारीचालक अनुमतिपत्रको परीक्षामा फेल भएकाहरुलाई पास गराउनका लागि घुस लिइसकेपछि आयोगको टंगालबाट खटिएको टोलीले शुक्रबार यातायात व्यवस्था कार्यालय भरतपुर, चितवनका कार्यालय सहायक इन्द्रजित गुरुङको कार्यकक्षबाट रु. १ लाख ८५ हजार रुपैयाँ बरामद गरेको छ । उक्त घुस रकमसहित कार्यालय सहायक गुरुङ र बिचौलिया सुरज पाठकलाई यातायात व्यवस्था कार्यालय भरतपुर, चितवनको कार्यालय परिसरबाट नियन्त्रणमा लिएको आयोगको विज्ञप्तिमा उल्लेख छ ।

यातायात कार्यालय भरतपुरका कार्यालय प्रमुख बिष्णु भट्टराई तथा अन्य कर्मचारीहरु र बिभिन्न ड्राइभिङ सेन्टरका संचालकहरुको बिद्युतीय उपकरण मोबाइल ३१ भन्दा बढी, ल्याप्टप २ थान र अन्य कागजातहरुसमेत बरामद गरेको छ । ल्यापटप र मोवाइलसमेत बरामद गरेकाले ड्राइभिङ सेन्टर र यातायात कार्यालयका प्रमुखसहितका कर्मचारीहरुको मोवाइल फरेन्सिक ल्याबमा पठाएर लाइसेन्समा हुने गरेको अर्को डरलाग्दो सेटिङ भण्डाफोर हुने भएको छ ।