भोटेकोशी बाढीमा ज्यान गुमाउने प्रहरीका परिवारले २५ लाख १० हजार पाउने, सरकारबाट थप सहयोगको अपेक्षा

काठमाडौं । गएको भदौ १० गतेको प्रलयकारी भोटेकोशी बाढीमा परी ज्यान गुमाएका प्रहरी कर्मचारीका परिवारले २५ लाख १० हजार रुपैयाँबराबरको राहत तथा सुविधा पाउने भएका छन् ।

नेपाल प्रहरीका अनुसार मृतक प्रहरी कर्मचारीका परिवारलाई कल्याण कोषबाट तीन लाख, किरिया खर्चबापत रु ४० हजार, राष्ट्रिय वाणिज्य बैङ्कबाट ५ लाख रुपैयाँको बीमा, राष्ट्रिय बीमा संस्थानबाट दुई लाख तथा नेपाल प्रहरी संगठनबाट विशेष राहतस्वरूप १० लाख रुपैयाँ उपलब्ध हुनेछ ।

त्यसैगरी, कर्मचारी सञ्चय कोषबाट दुर्घटना क्षतिपूर्तिबापत दुई लाख र किरिया खर्च ४० हजार रुपैयाँ उपलब्ध हुने व्यवस्था छ । नागरिक लगानी कोषका स्वेच्छिक बचतकर्ताले प्रचलित सर्तअनुसार दुर्घटना बीमाबापत रु दुई लाख र किरिया खर्चबापत ३० हजार रुपैयाँ पाउनेछन् ।

यसरी मृतक प्रहरी कर्मचारीका परिवारले सम्बन्धित कोष तथा बीमा सुविधासहित २५ लाख १० हजार रुपैयाँ प्राप्त गर्ने नेपाल प्रहरीले जनाएको छ ।

नेपाल प्रहरीका महानिरीक्षक दानबहादुर कार्कीले कर्तव्य पालनाका क्रममा ज्यान गुमाएका प्रहरी कर्मचारीप्रति श्रद्धाञ्जली व्यक्त गर्दै शोकसन्तप्त परिवारलाई आवश्यक सहयोग उपलब्ध गराउने प्रतिबद्धता व्यक्त गरेका छन् ।

महानिरीक्षक कार्कीले प्रभावित प्रहरी परिवारको जीविकोपार्जनमा सहयोग गर्नाका साथै मृतक तथा प्रभावित प्रहरी कर्मचारीका छोराछोरीको शिक्षामा आवश्यक व्यवस्था मिलाउने बताएका छन् ।

नेपाल प्रहरी कल्याण कोषबाट लिइएका ऋणसम्बन्धी सुविधामा आवश्यकताअनुसार सहुलियत तथा मिनाहाको व्यवस्था गरिने पनि उहाँले प्रतिबद्धता व्यक्त गरेका छन् ।
नेपाल प्रहरीका प्रवक्ता अभिनारायण काफ्लेले भोटेकोशी बाढीमा ज्यान गुमाएका प्रहरी कर्मचारीका परिवारलाई सङ्गठन, कल्याण कोष तथा सम्बन्धित बीमा र सामाजिक सुरक्षा निकायबाट प्राप्त हुने सुविधालाई समन्वय गरी उपलब्ध गराइने जानकारी दिए ।

प्रहरी प्रधान कार्यालयका प्रहरी उपरीक्षक धर्मराज भण्डारीले मृतक प्रहरी कर्मचारीका परिवारले पाउने राहत तथा सुविधासम्बन्धी विवरणअनुसार आवश्यक प्रक्रिया अघि बढाइएको जानकारी दिएका छन् ।

भोटेकोशी बाढीमा प्रहरी कर्मचारी प्रभावित भएपछि प्रहरीले उद्धार, खोजी तथा राहतसँगै प्रभावित प्रहरी कर्मचारी र उनीहरूका परिवारको सहयोगका लागि विशेष व्यवस्था अघि बढाएको जनाएको छ । भोटेकोशी बाढीमा परेर ३ प्रहरीको मृत्यु भएको छ भने २५ जना बेपत्ता भएका छन् ।

भोटेकोशी बाढीमा मृत्यु तथा बेपत्ता भएका प्रहरी परिवारलाई संगठनबाट २५ लाख १० हजार रुपैयाँका अलावा सरकारले पनि थप सहयोग गर्नुपर्ने आवाज उठिरहेको छ । सरकारले पनि मृतक र बेपत्ताका प्रहरीका परिवारलाई थप सहयोग गरेमा आश्रितहरुका सन्तानलाई शिक्षादीक्षादेखि लालनपालनमा थप टेवा पुग्ने अपेक्षा पनि गरिएको छ ।