अपराधिक उपद्रवको आरोपमा पक्राउ, नक्कली बिरामी बनेर अस्पताल भर्ना

काठमाडौं । रवि लामिछाने गृहमन्त्री हुँदा प्रहरीले पक्राउ गरेका आरोपीले डाक्टरलाई बिरामी भएको नक्कली सिफारिस बनाउन लगाएर अस्पताल भर्ना गर्ने क्रम रोकेका थिए । तर लामिछाने गृहमन्त्रीबाट हटेसँगै पहँुचवालाहरुले पक्राउ पर्नासाथ डाक्टरको सिफारिस बनाउन लगाई अस्पतालमा बस्ने क्रम सुरु गरेका छन् ।

पूर्वप्रेमीको घरमा राति गएर गाडी र घरमा तोडफोड गर्ने सपना लामिछानेलाई आपराधिक उपद्रव गरेको आरोपमा प्रहरीले पक्राउ गरेको थियो । तर उनले पक्राउ पर्नासाथ एक एआईजीको पहुँच प्रयोग गरी नक्कली बिरामी भएर ग्रिनसिटी अस्पतालमा जाने सुबिधा पाएकी छन् । लामिछानेलाई रानीपोखरीबाट पक्राउ गरिएको काठमाडौँका एसएसपी वसन्त रजौरेले बताएका छन् । उनीविरुद्ध काठमाडौँ जिल्ला अदालतबाट पक्राउ अनुमति आएको हुनाले अनुसन्धानका लागि नियन्त्रणमा लिइएको एसएसपी रजौरेले जानकारी दिएका छन् ।

केही दिनअघि काठमाडौंको चण्डोलमा राति १० बजे अर्काको घरमा गएर उनले गाडी लगायका सामग्री तोडफोड गरेको आरोप छ । प्रहरीका अनुसार तोडफोडमा संलग्न अर्की महिला फरार छन् । शुक्रबार प्रहरीले पक्राउ गर्नुअघि उनले सामाजिक संजाल फेसबुकमा लाइभ गरेर ‘बलात्कार मुद्दा दबाउन प्रहरीले पक्राउ गरेको’ आरोप लगाएकी थिइन् ।

उपत्यका प्रहरी कार्यालय रानीपोखरीबाट लाइभ गरेर उनले भनेकी छन्–‘एआईजी किरण बज्राचार्यले मलाई बोलाउनुभो अनि, मेरो अर्को मुद्दा दबाउन पक्राउ गरिएको छ ।’ पक्राउ पूर्जी आएको थाहा पाएपछि छाड्न नमिल्ने भएको हुनाले महाराजगञ्जको टोली बोलाएर जिम्मा लगाएको एआईजी किरण बज्राचार्यको भनाइ आएको छ । लामिछानेलाई सृजना बस्नेतले दिएको जाहेरीका आधारमा पक्राउ पूर्जी जारी गरी नियन्त्रणमा लिएको प्रहरीले बताएको छ ।

नारायणकाजी श्रेष्ठ गृहमन्त्री हुँदा बानेश्वरतिर रहेको उनको क्याफेमा प्रहरीका उच्च अधिकारीको सरुवाका डिल हुने गरेको थियो । श्रेष्ठ गृहमन्त्री हुँदा प्रहरीका सरुवा बढुवा समेत गराउनसक्ने हैसियतकी सरला लामिछाने प्रहरीका उच्च अधिकारीको लाम नै लाग्ने गरेको थियो ।

डीएसपीदेखि एसएसपी र डीआईजीसम्मको सरुवा बढुवा नै गराउने हैसियत भएकी ती महिलाको श्रेष्ठ गृहमन्त्री हुँदाको चुरीफुरी प्रहरीका धेरैले बयान गर्ने गर्थे । तिनै महिला आफैं प्रहरीको हिरासतमा पुगेकी छन् । पूर्वप्रेमीको सम्पत्ति दोहन गर्ने क्रम अति बढेपछि उनी टाढिए । ती प्रेमी टाढिएपछि उनले बिहे गर्छु भनेर शोषण गरेको मुद्दासमेत हालेर तीन महिना थुनाइन् । तर अदालतले निर्दोष ठहर गरेपछि पनि उनले ती पूर्वप्रेमीसँग अंश माग्ने, सम्पत्ति माग्ने र मानसिक टर्चर दिन थालेपछि लामिछानेका बिरुद्ध एआईजी बज्राचार्यसम्मै कुरा पुगेपछि पक्राउ परेकी थिइन् ।