बूढानीलकण्ठमा प्रहरीले चलायो गोली

काठमाडौं । काठमाडौंको बूढानीलकण्ठ क्षेत्रमा लुटपाट तथा मोटरसाइकल चोरीका घटनामा संलग्न एक जनालाई प्रहरीले गोली प्रहार गरी पक्राउ गरेको छ ।

जिल्ला प्रहरी परिसर काठमाडौंका अनुसार पक्राउ पर्नेमा लुटपाटमा संलग्न कर्मा तामाङ रहेका छन् । उनी सिक्री लुटपाट र मोटरसाइकल चोरीका विभिन्न घटनामा संलग्न रहेका व्यक्ति हुन् ।

प्रहरीले शनिबार राति पक्राउ गर्ने क्रममा गोली प्रहार गर्नुपरेको जनाएको छ । गोली लागेर घाइते भएका तामाङको हाल वीर अस्पतालको ट्रमा सेन्टरमा उपचार भइरहेको छ । उनको स्वास्थ्य अवस्था निगरानीमा रहेको प्रहरीले जनाएको छ ।

प्रहरीका अनुसार तामाङ यसअघि पनि पक्राउ परेका व्यक्ति हुन् । उनी जेनजी आन्दोलनका क्रममा फरार भएका थिए र त्यसयता प्रहरीको खोजी सूचीमा रहेका थिए ।
घटनाबारे थप अनुसन्धान भइरहेको जिल्ला प्रहरी परिसर काठमाडौंले जनाएको छ ।