१ करोडको सुनचाँदी चोरलाई नागार्जुनबाट गोली हानी पक्राउ

काठमाडौं । पछिल्ला दिनमा चोरीका घटना बढिरहेका छन् । मूलपानीमा लुटपाट गर्ने समूहलाई गोली हानी पक्राउ गरेको प्रहरीले गएराति करिब ७० तोलाको सुनचाँदीका गरगहना चोरी गरेको आरोपमा अर्को समूहलाई पक्राउ गरेको छ ।

मूलपानीमा जस्तै प्रहरीले काठमाडौंको नागार्जुन नगरपालिकाको महांकालबाट एक जनालाई गोली हानेरै पक्राउ गरेको छ ।

प्रहरीका अनुसार नेपालगन्ज घर भएका प्रेम थारुलाई गएराति करिब ११ः३० बजे नियन्त्रणमा लिन खोज्दा उनी भाग्न प्रयास गरेपछि गोली प्रहार गरिएको हो ।

जिल्ला प्रहरी परिसर काठमाडौंका प्रवक्ता पवन भट्टराईले बौद्ध क्षेत्रबाट हराएको सुनचाँदीका गरगहनासँग सम्बन्धित अनुसन्धानका क्रममा थारुलाई शंका लागेर चेकजाँच गर्दा उनले प्रहरीमाथि आक्रमण गरेको बताए ।

आक्रमणपछि नियन्त्रणमा लिन बाध्य भएर प्रहरीले गोली चलाएको उनको भनाइ छ ।

प्रहरीका अनुसार थारु यसअघि २०७९ सालमा चोरी मुद्दामा ३ वर्ष जेल सजाय भोगेर रिहा भएका थिए ।

गोली थारुको खुट्टामा लागेको र हाल उनको ट्रमा सेन्टरमा उपचार भइरहेको प्रहरीले जनाएको छ ।

घटनाबारे थप अनुसन्धान जारी रहेको जिल्ला प्रहरी परिसर काठमाडौंले जनाएको छ ।