काठमाडौैंका प्रहरी प्रमुख परिवर्तन गर्दै गृहमन्त्री, दिलीप घिमिरेलाई ल्याउने तयारी

काठमाडौं । गृहमन्त्री सुधन गुरुङले जिल्ला प्रहरी परिसर काठमाडौंका प्रमुख एसएसपी परिवर्तन गर्न लागेका छन् ।

शनिबार भैंसेपाटीस्थित सशस्त्रका एक एसएसपीको घरमा गृहमन्त्री गुरुङ र केही प्रहरी अधिकृतको बैठक भएपछि काठमाडौंका एसएसपी परिवर्तन गर्ने छलफल भएको स्रोतले बताएको छ ।

मन्त्री गुरुङ शुक्रबार जिल्ला प्रहरी परिसर ललितपुरमा पुगेका थिए । जहाँ ललितपुरका एसएसपी होविन्द्र बोगटीले एसएसपी दिलीप घिमिरे, झापाकी एसपी बसुन्धरा खड्का र सशस्त्रका एसएसपी राजेश घिमिरेसँग भेटघाटको संयोजन गरेका थिए । खड्का एसएसपी घिमिरेकी पत्नी हुन् । राजेश दिलीपका भाइ हुन् ।

मन्त्री गुरुङ राजेश घिमिरेसँग शनिबार भेट्नेगरी ललितपुर परिसरबाट बिदा भएका थिए । शनिबार भैंसेपाटीमा छलफलपछि काठमाडौंका एसएसपी रमेश थापालाई परिवर्तन गरी दिलीप घिमिरेलाई कमाण्ड दिने तय भएको स्रोतको दाबी छ ।