काठमाडौँ महानगरले २ वटा औषधि पसल सिल गर्‍यो

काठमाडौं। काठमाडौं महानगरपालिकाले नियम नमान्ने महानगर क्षेत्रका दुई वटा औषधि पसलमा सिलबन्दी गरेको छ । बुधबार अनुगमनका क्रममा महानगरपालिकाको पूर्वसूचना बमोजिम नगरिएको र दर्तासमेत नरहेको पाइएपछि महानगरपालिकाले दुई वटा औषधि पसलको सटक सधैँका लागि बन्द गरिदिएको हो ।

वडा नं. १७ ठमेलमा रहेको हिमालय स्टोर र वडा नं. ३ महाराजगञ्जमा रहेको माइबेनी मेडिकल हलमा महानगरपालिकाले सिलबन्दी गरेको हो ।

महानगरको स्वास्थ्य विभागका प्रमुख रामप्रसाद पौडेलले कानुनबमोजिम दर्ता नभएका, एउटा प्रयोजनमा दर्ता भएर अर्को काम गरिरहेको, अनधिकृत औषधि बेचेको, पसलमा म्याद सकिएको औषधि पाइएकाले सिलबन्दी गरिएको बताए ।

उनका अनुसार अर्को एउटा पसललाई भने सुधारका लागि १५ दिनको म्याद दिइएको छ । वडा नं. १ मा रहेको कृषि आयुर्वेदिक फार्मेसीलाई सुधारकलागि १५ दिनको समय दिइएको छ ।