नापी अधिकृतको १ करोड ४ लाख अकूत सम्पत्ति भेटियो, अख्तियारद्वारा मुद्दा दर्ता

काठमाडौं । अख्तियार दुरुपयोग अनुसन्धान आयोगले नापी कार्यालय, चाबहिलमा कार्यरत नापी अधिकृत राजु पुरीबिरुद्ध गैरकानुनी सम्पत्ति आर्जनमा आइतबार मुद्दा दर्ता गरेको छ ।
पुरीले भ्रष्टाचार गरी गैरकानूनी सम्पत्ति आर्जन गरेको भन्ने उजुरीमा आयोगले अनुसन्धान गरेको थियो । उनी सार्वजनिक सेवा प्रवेश गरेको २०५२ पुस ९ गतेदेखि २०७९ असार मसान्तसम्मको अवधिको छानबिन गरेको थियो ।

नापी अधिकृत पुरीको आयतर्फ पारिश्रमिक बचत, अन्य भत्ता, विभिन्न बैंक वित्तीय संस्था तथा सहकारीबाट लिएको कर्जा, उनको नाममा रहेको जग्गा बिक्रीबापत प्राप्त आय, कृषि आय, घर तथा जग्गा बहाल आय, बिमा परिपक्व भई प्राप्त रकम, ब्याज आय र जग्गाको मुआब्जा प्राप्त आयसमेत गरी १ करोड २० लाख ७७ हजार ७९ पैसा आय प्राप्त गरेको देखिएको आयोगले जनाएको छ ।

आयोगका अनुसार व्ययतर्फ हेर्दा उनी तथा उनको श्रीमतीको नाममा जग्गा खरिद गर्दाको रकम र रजिष्ट्रेशन दस्तुर, घर निर्माण खर्च, अध्ययन खर्च, कर्जाको साँवा तथा व्याज भुक्तानी, शेयर खरिद, लाभ कर, विदेश भ्रमण खर्च, बिमा प्रिमियम, सवारी साधन खरिद र विद्युतीय सामान खरिदसमेत गरी २ करोड २४ लाख ८१ हजार ६ सय ९० रुपैयाँ ५२ पैसा खर्च तथा लगानी गरेको देखिएको छ ।

व्ययको तुलनामा उनले प्राप्त गरेको आय रकम रु. १ करोड ४ लाख ३ हजार ९ सय ४१ रूपैयाँ ८३ पैसा बराबरको खर्च तथा लगानीको वैधानिक स्रोत खुल्न आएको नदेखिएको आयोगले जनाएको छ ।

पुरीले सार्वजनिक सेवाको पदमा बहाल रहँदा आफ्नो पदीय हैसियतको दुरुपयोग गरी गैरकानूनी सम्पत्ति आर्जन गर्नुका साथै अमिल्दो र अस्वाभाविक उच्च जीवनस्तर यापन गरेको पुष्टि हुन आएको देखिंदा उनले साबिक भ्रष्टाचार निवारण ऐन, २०१७ को दफा १५ र सो कसुरलाई निरन्तरता दिएको प्रचलित भ्रष्टाचार निवारण ऐन, २०५९ को दफा २० को उपदफा (१) बमोजिमको कसुर गरेकोले १ करोड ४ लाख ३ हजार ९ सय ४१ रूपैयाँ ८३ पैसा बिगो मागदाबी गर्दै बिशेष अदातमा मुद्दा दर्ता गरेको आयोगका प्रवक्ता भोला दाहालले जारी गरेको विज्ञप्तिमा उल्लेख छ ।

अख्तियार दुरूपयोग अनुसन्धान आयोग ऐन, २०४८ को दफा २९ ख बमोजिम गैरकानूनी रुपमा आर्जन गरेको पुरीको सम्पत्ति जफत एंव असुल हुनसमेत मागदाबी लिइएको छ ।
साथै, पुरीले सार्वजनिक पदमा रहँदा गैरकानुनी रुपमा आर्जन गरेको सम्पत्ति र सोबाट बढे बढाएको सम्पत्ति श्रीमती श्रृजना गिरीको नाममा राखेको देखिएको हुँदा उनको नाममा रहेको सम्पत्ति समेत जफतको माग गरिएको छ ।