संचारमाध्यमलाई खतिवडाको प्रश्न : निजामती कर्मचारी यो देशका शत्रु हुन् ?

भवानी खतिवडा

अहिले निजामती सेवा ऐन निर्माणको क्रममा रहेको छ । केही सञ्चार माध्यमहरूले बेलाबखत यस सम्बन्धी समाचारहरू लेख्छन् । समाचार पनि यसरी लेख्छन् कि मानौँ निजामती कर्मचारीहरू यो देशका शत्रु हुन् र हरहिसाबले पाता कस्ने खालको ऐन ल्याएर यिनीहरूलाई तह लगाउनुपर्छ । धेरैभन्दा धेरै निजामतीलाई घोक्रे ठ्याक लाएर घर पठाउनुपर्छ । त्यसो गरियो भने मात्रै देशले अकल्पनीय कायापलट गर्नेछ ।

निजामती कर्मचारीका लागि ल्याइन लागेको निजामती सेवा ऐनको स्वरूप कस्तो छ, ऐनमा के कस्ता प्रावधानहरू राखिएका छन् भन्ने कुराको सुइँकोसम्म पाइएको छैन ।
जसका लागि ऐन ल्याउन लागिएको हो उनीहरूलाई नै गुमराहमा राखेर ल्याइने ऐन कस्तो हुन्छ ? यो त भविष्यले नै बताउला ।

समाचारमा फैलाइएको अफवाहका पछि लागेर झन्डै एक हजार कर्मचारीले राजीनामा दिएर सेवाबाट अलग भइसकेका छन् ।

३० वर्ष सेवा अवधि र ५५ वर्ष उमेर पुगेका कर्मचारीहरू त्रसित मानसिकता बोकेर जागिर खाइरहेका छन ।

आदरणीय कर्मचारी मित्रहरू,
हामी एउटा सेवा र शर्तको अधिनमा रहेर निजामती सेवामा प्रवेश गरेका कर्मचारी हौँ । ५८ वर्ष उमेरसम्म जागिर खाने र जति वर्ष सेवा गरेको हो त्यति बर्षको अवधि गणना गरेर निवृत्तिभरण लिन पाउने अधिकारसहित सेवा प्रवेश गरेका हौँ ।

सरकारले हामीलाई स्वेच्छिक अवकाशको प्रावधान ल्याएर घर जाऊ भन्न पाउँछ । हामी सोही बमोजिम घर जान तयार पनि छौं तर अहिले समाचारमा लेखिएजस्तो जबर्जस्ती घर पठाउने र जतिसुकै बर्ष सेवा गरेको भए पनि पेन्सन सुविधामा ३० वर्षभन्दा बढी गणना नहुने भन्ने प्रावधान साँच्चिकै राखिएको हो भने चाहिँ हामी न्याय प्राप्तिका लागि लड्नुपर्छ भन्नेमा छु म ।

तपाईँहरू के भन्नुहुन्छ ? आउनुहोस् छलफल गरौँ …