अघिल्लो सरकारले खारेज गरेको निर्णय उल्ट्याउँदै सभामुख, सांसदहरूले स्वकीय सचिव राख्न पाउने

काठमाडौं । सांसदहरुले स्वकीय सचिवको सुबिधा पाउने भएका छन् । जेनजी बिद्रोहपछि गठन भएको सुशीला कार्की सरकारले सांसदहरुले स्वकीय सचिव राख्न पाउने ब्यवस्था खारेज गरेको थियो । तत्कालीन अर्थमन्त्री रामेश्वरप्रसाद खनालले उक्त सुविधा खारेज गराउन भूमिका खेलेका थिए ।

सुशासन कायम गर्न उक्त सुविधा खारेज गरेपछि सत्तारुढ रास्वपाकै सांसदहरुले बिरोध गर्दैआएका थिए । रास्वपाका सहमहामन्त्री विपिन आचार्यले नै स्वकीय सचिव सांसदले राख्न पाउनुपर्ने अभिब्यक्ति निर्वाचनमा बिजयी हुनासाथ राख्दैआएका छन् ।

रास्वपाकै सांसदहरुको दाबबमा स्वकीय सचिवको सुबिधाको ब्यवस्था गर्न सभामुख डोलप्रसाद अर्याल नै अग्रसर भएका छन् ।

सांसदहरुलाई स्वकीय सचिवको ब्यवस्था गर्नका लागि संघीय संसद सचिवालय सञ्चालन तथा व्यवस्थापन समितिको बैठकले प्रक्रिया अघि बढाइएको छ ।

सोमबार संघीय संसद सचिवालय सञ्चालन तथा व्यवस्थापन समितिको बैठक बसेको थियो । उक्त बैठकले संघीय संसदका पदाधिकारी तथा सदस्यहरूको स्वकीय सचिवको योग्यता निर्धारण गरी व्यवस्थित गर्ने प्रक्रिया अघि बढाउन सरकारलाई सिफारिस गर्ने निर्णय गरेको हो ।