दीपक खड्काका बिचौलिया केसीलाई लगानी बोर्डको सदस्य नियुक्ति गर्दै प्रधानमन्त्री कार्की

काठमाडौं । जेनजी पुस्ताले गएको भदौ २३ र २४ गते आन्दोलन गरी सत्ताबाट बिस्थापित गरेको केपी ओली सरकारका सबैभन्दा विवादित र बदनाम मन्त्री दीपक खड्काका ब्यापारीक साझेदार अरुण केसीलाई नागरिक सरकारले लगानी बोर्डको सदस्य नियुक्त गर्ने भएको छ ।

पूर्वऊर्जामन्त्री खड्काका जग्गादेखि होटल सबै ब्यवसायमा साझेदार रहेका केसीलाई प्रधानमन्त्री सुशीला कार्कीले आज बस्ने लगानी बोर्डको बैठकमा उनलाई सदस्य बनाउने एजेन्डा राख्न लगाएकी छन् । लगानी बोर्डको अध्यक्ष प्रधानमन्त्री हुन्छन् ।

अरुण केसी खड्का उर्जामन्त्री हुँदा विद्युत प्राधिकरणको पीपीएदेखि सबैको डिल गर्ने बिचौलियाका रुपमा परिचालित पात्र थिए । केसी दीपक खड्काका कतिपय हाइड्रोपावरको साझेदारसमेत हुन् । सोलार पावरको पीपीएमा पनि अरुण केसी जोडिएका थिए ।

जेनजीले खड्का संलग्न जगदुल्लाको चेक काण्ड छानबिन गर्न उजुरीको दिएको छ । १०६ मेगावाट क्षमताको डोल्पामा बन्ने जगदुल्ला हाइड्रोपावर कम्पनीको ठेक्कामा पूर्व उर्जा, सिंचाई तथा जलस्रोत मन्त्री दीपक खड्का विरुद्ध चेक लेनदेन गरेको प्रमाणमा अख्तियारमा उजुरी परेको थियो । अख्तियारले जेनजीको उजुरीपछि पनि छानबिन फाष्टट्रयाकमा अगाडि बढाएको छ ।

जेनजीले खड्काको जगदुल्ला चेक काण्ड, स्काउटदेखि बिद्युत खरिद सम्झौता( पीपीए) र सरुवामा भएको अनियमिततामा पनि उजुरी दिएको छ । अख्तियारले खड्कामाथि लागेको आरोपसँग सम्बन्धित प्रमाणसमेत फेलापारेको छ । उक्त प्रमाणलाई प्रहरीको विधि विज्ञान प्रयोगशालामा समेत पठाइएको छ ।

खड्का र उनका बिचौलिया अरुण केसीले जगदुल्लामा पूरै लागत स्टीमेट (भ्याटबाहेक १३ अर्ब ४० करोड) मा ठेक्का दिलाउन तत्काल पटेलको नामबाट काटेको घुसबापतको चेकको फोटोकपीसहित अख्तियारमा उजुरी परेको थियो ।

८ सय मेघावाटको सोलार प्लान्टको पीपीएमा समेत अरुण केसीले दीपक खड्काको तर्फबाट डिल गर्ने जिम्मा पाएका थिए । मन्त्री खड्काको निर्देशनमा उत्तम ब्लोन तामाङ र अरुण केसीको बिचौलिया समूह सोलार कम्पनीहरूसँग मोलमोलाइमा सक्रिय भएको थियो । यो समूहले प्रतिमेगावाट ३ लाख घुसको दररेट तय गरी बिद्युत खरिद सम्झौता (पीपीए) र सोलार आयोजनाको सर्भे लाइसेन्स गराउने जिम्मा नै लिएको थियो ।

सर्वोच्च अदालतका बरिष्ठतम न्यायाधीश सपना मल्ल प्रधानको सिफारिसमा आफू लगानी बोर्डमा नियुक्त हुन लागेको भन्दै बिचौलिया केसीले भोजभतेरसमेत गरिसकेका छन् ।