सेटिङमा सिंचाईका डीई र सुईको सरुवा गर्दै मन्त्री खड्का, सचिवसहितको टोली भैंसेपाटीमा तैनाथ

काठमाडौं । गाईजात्राको अवसरमा संघीय सरकारले आज सार्वजनिक बिदा दिएको छ । तर त्यही संघीय सरकारका ऊर्जा, जलस्रोत तथा सिंचाई मन्त्री दीपक खड्कालाई भने कर्मचारी सरुवाको सूची बनाउन भ्याई नभ्याई छ ।

नेपाली कांग्रेसका सभापति शेरबहादुर देउवा निवास बुढानीलकन्ठको छेउमै बसोबास गर्दैआएका मन्त्री खड्का आज भने सरुवाको सूची बनाउनका लागि भैंसेपाटी मन्त्री निवास पुगेका छन् । भैंसेपाटीको मन्त्रीनिवासमा नबसे पनि मन्त्री खड्काले एउटा क्वाटर सेटिङका लागि ओगटेर राखेका छन् ।

आइतबार बिहानदेखि नै खड्का र उनको सचिवालयको टोली त्यही भैंसेपाटीको ओगटेको क्वाटरमा पुगेको छ । मन्त्री खड्काले प्रशासन महाशाखा प्रमुख शम्भुप्रसाद मरासिनी टिप्पणी उठाउनेदेखि उपसचिवसहितको टोली लिएर उतै गएका छन् । मन्त्रालयको सिंचाईतर्फकी सचिव सरिता दवाडी पनि भैंसेपाटी नै पुगेको स्रोतको दाबी छ ।

सिंचाईतर्फको उपसचिव(सीडीई) र सहसचिव(सुई)को सरुवाको सूची बनाउने र सोमबारको मितिमा आजै सदर गर्ने तयारी मन्त्री खड्काको रहेको छ । ऊर्जातर्फको उच्चतहको सरुवा सकेर सिंचाईतर्फ आँखा लगाएका खड्काले गतहप्तामात्र सिंचाई बिभागका महानिर्देशक मित्र बराललाई जिम्मेवारी दिएका थिए । एक बर्षको बीचमा सेटिङमै ४ पटक डीजी फेरेका उनले पछिल्लो पटक पनि ठूलो रकम बोलकबोलमा बराललाई बिभागको नेतृत्व सुम्पेको चर्चा सिंचाईका कर्मचारीबीच हुने गरेको छ ।

भैंसेपाटीमा बिहानदेखि नै सेटिङमै रानीजमरा कुलरिया सिंचाई आयोजना, सिक्टा सिंचाई, भेरी बबई डाइभर्सन लगायत ठूला सिंचाई प्रमुखसमेत फेरेर सेटिङमा सरुवा गर्न लागिएको स्रोत बताउँछ । अन्य सिंचाई आयोजनाका प्रमुखहरुको फेरबदल पनि हुँदैछ ।

सरुवा सेटिङको नेतृत्व मन्त्री खड्काले स्वयं नै गरेको बताइन्छ । सचिवालय र कर्मचारीको प्राविधिक सहयोगमात्र उनले लिएका छन् । सरुवा हुने प्रत्येक डीई र सुईसँग मन्त्रीले सिधै डिल गरेको स्रोतको दाबी छ । खानाखाजासमेत भैंसेपाटीमै मगाएर ज्यूनार गरेर भए पनि जसरी पनि आज रातिसम्म सरुवाको सूचीलाई अन्तिम रुप दिने तयारीमा मन्त्री खड्का लागेका छन् ।