पूर्वमन्त्री खड्का पक्राउको विरोधमा कांग्रेस संखुवासभा आक्रामक, ‘विधिको शासनमाथि हस्तक्षेप अस्वीकार्य’

संखुवासभा । नेपाली कांग्रेस संखुवासभा जिल्ला कार्यसमितिले पूर्वमन्त्री तथा पार्टीका नेता दीपक खड्काको पक्राउप्रति गम्भीर आपत्ति जनाउँदै उक्त कदम राजनीतिक पूर्वाग्रहबाट प्रेरित भएको आरोप लगाएको छ ।

जिल्ला कार्यसमितिका सचिव कुमार बाबु अधिकारीले आइतवार जारी गरेको प्रेस विज्ञप्तिमा नेपाल प्रहरीको केन्द्रीय अनुसन्धान ब्यूरो (सीआईबी) मार्फत् गरिएको पक्राउप्रति ध्यानाकर्षण भएको उल्लेख गर्दै लोकतान्त्रिक मूल्य, विधिको शासन र मानवअधिकारप्रति प्रतिबद्ध जिम्मेवार नेतामाथि गरिएको कारबाहीले कानुनी प्रक्रिया भन्दा बाहिर गएर राजनीतिक उद्देश्य बोकेको देखिएको ठहर गरेको छ ।

विज्ञप्तिमा कुनै पनि व्यक्तिमाथि आरोप लागेमा कानुनी प्रक्रिया अनुसार बोलाएर अनुसन्धान गर्नु, आवश्यक परे उपस्थित गराउनु र अधिकारको सुनिश्चितता गर्नु राज्यको दायित्व भएको उल्लेख गर्दै एक्कासी पक्राउ गर्ने शैलीले विधिको शासनमाथि नै प्रश्न उठाएको जनाइएको छ ।

यसैबीच, पछिल्ला घटनाक्रमहरूलाई जोड्दै विज्ञप्तिमा केपी शर्मा ओली र रमेश लेखक सँग सम्बन्धित घटनाहरूले समेत राज्य शक्ति राजनीतिक प्रतिशोधका लागि प्रयोग भइरहेको आशंका पैदा गरेको दाबी गरिएको छ । फरक विचार राख्ने नेताहरूलाई लक्षित गरिने यस्ता गतिविधिले लोकतान्त्रिक प्रणाली कमजोर बनाउने र मुलुकलाई अनावश्यक द्वन्द्वतर्फ धकेल्ने चेतावनी पनि दिइएको छ ।

जिल्ला कार्यसमितिले घटनालाई विपक्षी आवाज दबाउने प्रयासका रूपमा व्याख्या गर्दै यस्ता गतिविधि तत्काल रोक्न सरकारसँग माग गरेको छ । साथै, पूर्वमन्त्री खड्का लगायत सम्बन्धित सबै नेताहरूलाई बिना शर्त तत्काल रिहा गर्नुपर्ने मागसमेत राखिएको छ ।

विज्ञप्तिमा राज्यका सुरक्षा निकायहरूलाई कुनै पनि राजनीतिक दबाबमा नपरी स्वतन्त्र, निष्पक्ष र कानुनी दायराभित्र रहेर आफ्नो कर्तव्य निर्वाह गर्न आग्रह गरिएको छ । लोकतन्त्रको मूल मर्म फरक विचारको सम्मान र विधिको निष्पक्ष कार्यान्वयन भएको उल्लेख गर्दै यसबाट विचलित भए राजनीतिक प्रणालीमै नकारात्मक असर पर्ने चेतावनी दिइएको छ ।

कांग्रेस संखुवासभाले सम्पूर्ण लोकतन्त्रप्रेमी नागरिक, राजनीतिक दल र सरोकारवालाहरूलाई यस्ता गतिविधिविरुद्ध एकजुट हुन आह्वान गर्दै लोकतान्त्रिक मूल्य र विधिको शासनको पक्षमा उभिन आग्रह गरेको छ ।