प्रधानमन्त्री भएकै भोलिपल्ट सुदनले किन मागे कार्कीको राजीनामा ?

काठमाडौं । सुशीला कार्की शनिबार राति प्रधानमन्त्रीमा नियुक्त भइन् । राष्ट्रपति भवन शितलनिवासमा सपथग्रहण गरिसकेपछि कार्कीको खुट्टा ढोगेका जेनजी समूहका सुदन गुरुङले आइताबारै राजीनामा मागेका छन् ।

प्रधानमन्त्री निवास बालुवाटारअगाडि आइतबार मध्यराति सुदन गुरुङ समूहका युवाले कार्कीको राजीनामा माग गर्दै नाराबाजी गरेका छन् । आफूहरूको आन्दोलन हाइज्याक भएको दाबी गर्दै उनीहरूले सरकारविरुद्ध आक्रोश पोखेका हुन् ।

नाराबाजीका क्रममा जेनजी अगुवा सुदन गुरुङले तीव्र असन्तोष व्यक्त गर्दै भने, ‘म त लासमाथि हिँडिरहेको थिएँ, यहाँ क–कसलाई मन्त्री बनाउने खेल भइरहेको रहेछ ।’
उनका समर्थक युवाहरूले पनि आन्दोलनको नेतृत्वकर्ता आफूहरू नै भएको दाबी गर्दै, ‘हाम्रो आन्दोलन हाइज्याक भयो’ भन्दै चर्को नाराबाजी गरेका छन् ।

सुदन गुरुङले ओमप्रकाश अर्यालको नाम लिएर आक्रोश पोखेका छन् । ‘यो ओमप्रकाश लयर आफैंले गृहमन्त्री बनाउँदो रहेछ त्यहाँभित्र बसेर,’ उनले आक्रोशमा भनेका छन् ।

गुरुङले चेतावनीस्वरूप भने– ‘हामीले भनेको मानिएन भने भोलिदेखि सबैलाई बाहिर निकाल्छौँ ।’ उनीहरुले अधिवक्ता ओमप्रकाश अर्याललाई कानुन तथा गृहमन्त्री बनाएपछि प्रदर्शन गरेका हुन् ।

उनीहरुले प्रधानमन्त्री सुशीला कार्की ‘राजीनामा दे’ भन्दै नाराबाजी गरेका थिए ।

कानुनसहित गृहमन्त्रीमा नियुक्त ओमप्रकाश अर्याललाई नियुृक्ति गरेकोमा जेनजी समूह रुष्ट भएको छ । काठमाडौं महानगरपालिकाका मेयर बालेन्द्र साहका कानुनी सल्लाहकार रहेका अर्यालमाथि एउटा विवादास्पद मुद्दामा बहस पैरवी गरेको आरोप पनि लागेको छ ।