भिजिट भिसा प्रकरणः अख्तियारको अनुसन्धानमा रहेका सहसचिव भट्टराईको अमेरिकी भिसा रद्द

काठमाडौँ । त्रिभुवन अन्तर्राष्ट्रिय विमानस्थल अध्यागमन कार्यालयबाट अरब र यूरोपका देशमा भिजिट भिसाबाट नेपालीलाई उडाउँदा दैनिक ५० लाख घुस लिने गरेको आरोपमा अख्तियार दुरुपयोग अनुसन्धान आयोगको छानबिनमा रहेका गृह मन्त्रालयका सहसचिव तीर्थराज भट्टराई र उनकी पत्नी देवीमाया बराल (भट्टराई) का नाममा जारी पाँच वर्षे ‘मल्टिपल इन्ट्री’ अमेरिकी भिसा रद्द गरिएको छ ।
त्रिभुवन अन्तर्राष्ट्रिय विमानस्थलका प्रमुख अध्यागमन अधिकृतको रूपमा कार्यरत भट्टराईलाई गत बुधबार अख्तियार दुरुपयोग अनुसन्धान आयोगले नियन्त्रणमा लिएपछि अमेरिकी सरकारले उक्त कदम चालेको हो ।

स्रोतका अनुसार नेपालस्थित अमेरिकी दूतावासले भिसा रद्द गरिएको जानकारी परराष्ट्र मन्त्रालयलाई पठाइसकेको छ । गएको जेठ ७ गते बुधबार अख्तियार दुरुपयोग अनुसन्धान आयोगबाट खटिएको टोलीले भट्टराईलाई नियन्त्रणमा लिइएको थियो । सोही दिन सोधपुछ गरी पुनः हाजिर हुनेगरी छाडिएको थियो ।

अख्तियारले उनका मोबाइल तथा अन्य डिभाइसहरू समेत नियन्त्रणमा लिएको छ । ती डिभाइस फरेन्सिक परीक्षणका लागि पठाइएको छ ।