भिजिट भिसा प्रकरण : एयरपोर्ट अध्यागमनमा पटक–पटक सरुवा हुने कर्मचारीको नालीबेली

काठमाडौं । त्रिभुवन अन्तर्राष्ट्रिय विमानस्थल अध्यागमन कार्यालयमा विगत लामो समयदेखि भिजिट भिसामा घुस लेनदेन गरी नेपालीलाई खाडी मुलुक पठाउने कार्य हुँदैआएको थियो । एक बर्षदेखि यूरोपका बिभिन्न मुलुकमा भिजिट भिसामा नेपालीलाई पठाउने क्रम सुरु भएको छ ।

खाडी मुलुकमा ५० हजार रुपैयाँसम्म घुस लिने गरिएको थियो भने यूरोपमा पठाउँदा एक ब्यक्ति बराबर ३ लाख रुपैयाँसम्म घुस कारोबार हुँदैआएको तथ्य बाहिरिएको छ । अध्यागमन कार्यालयमा घ्ुस संकलन गरी पद अनुसार भागबण्डा लगाउने गरिन्छ । अध्यागमन कार्यालयमा मासिक लाखौं कमाइ हुने भएकाले त्यहाँ शक्तिकेन्द्र गुहारेर कर्मचारी सरुवा हुने गर्दछन् । शक्तिकेन्द्र गुहारेर मात्र होइन, दररेट बुझाएर अध्यागमन कार्यालय एयरपोर्टमा कर्मचारीहरु सरुवा हुने गरेका छन् ।

निजामती सेवा नियमावली अनुसार हरेक २ बर्षमा कर्मचारीको सरुवा हुन्छ । प्रायः २ बर्ष एउटा कार्यालयमा काम गरिसकेको कर्मचारी पुनः त्यही कार्यालयमा फर्र्र्किएर जाँदैन, स्वार्थ भएकै कारण एयरपोर्ट अध्यागमनमा भने फर्की फर्की एक, दुई, तीनपटक होइन, चौथो पटकसम्म सरुवा भएर जाने गरेका छन् । भिजिट भिसामा सेटिङमा पठाउँदा अतिरिक्त कमाइ मासिक लाखौं हुने भएकाले पनि त्यसरी कर्मचारी फर्कीफर्की जाने गरेका छन् ।

रमेश लेखक गृहमन्त्री भएपछि पटक पटक विवादमा परेका, यसअघि भिजिट भिसामा तानिएका र मुद्दा चलेकालाई एकपटक, दुईपटक होइन, तीन पटक अध्यागमनमा बसिसकेका अकूत सम्पत्ति कमाउने कर्मचारीलाई चौथो पटक सरुवा गरिएका तथ्य प्राप्त भएका छन् ।

लेखकको सचिवालयका उपसचिव बद्री तिवारी, बिमल पौडेलहरुले अध्यागमन कार्यालय एयरपोर्टमा दरबन्दीभन्दा बढी कर्मचारी सरुवा गरेका छन् । विगतमा अध्यागमनमा बसिसकेका अकूत सम्पत्तिवालालाहरुलाई नै छानीछानी गृहमन्त्रीको सचिवालयले सरुवा गरेका केही कर्मचारीहरुको सूची यस्तो छ :

लेखक गृहमन्त्री भएपछि शाखा अधिकृतद्वय भोजबहादुर ऐडी र शम्भु ठकुल्ला चौथोपटक अध्यागमन कार्यालय एयरपोर्टमा सरुवा भएका हुन् ।

अधिकृतहरु दुर्गा थापा, सुवास शर्मा पौडेल, गणेशविक्रम शाह, रेश्मा बुढा, नरेन्द्रसिंह कुँवर, दीपक पाण्डे तेस्रो पटक अध्यागमन कार्यालय एयरपोर्टमा सरुवा भएकी हुन् ।

दोस्रो पटक फर्केर अध्यागमन कार्यालय विमानस्थलमा सरुवा हुने अधिकृतहरुमा खगराज गौतम, प्रभा अर्याल, बबिता मरासिनी, देवी चालिसे र सरोज खनाल, केशव बस्याल हुन् ।

अध्यागमन कार्यालय एयरपोर्टमा पटक पटक सरुवा हुने कर्मचारीकै कारण भिजिट भिसा प्रकरण दोहोरिन पुगेको हो । र, त्रिभुवन अन्तर्राष्ट्रिय विमानस्थल मानवतस्करीका कारण बदनाम हुन पुगेको छ । जसका कारण नेपालकै छविमा आघात पुगेको छ । भिजिट भिसामा जानेहरु विदेशमा पुगेर अलपत्र पर्ने गरेका छन् । दलालहरुले उनीहरुलाई आकर्षक रोजगारीको प्रलोभन दिएर लाखौं लिएर लाने र अलपत्र पार्ने गरेका छन् ।