पूर्वऊर्जामन्त्री दीपक खड्कालाई थुनामुक्त गर्न सर्वोच्चको आदेश

काठमाडौं । सर्वोच्च अदालतले पूर्व ऊर्जामन्त्री तथा नेपाली कांग्रेसका नेता दीपक खड्कालाई थुनामुक्त गर्न आदेश दिएको छ ।

कामु प्रधानन्यायाधीश सपना प्रधान मल्ल र न्यायाधीश श्रीकान्त पौडेलको संयुक्त इजलासले बिहीबार बन्दीप्रत्यक्षीकरण रिटमाथि सुनुवाइ गर्दै खड्कालाई तत्काल रिहा गर्न आदेश दिएको हो ।

खड्कालाई यसअघि सम्पत्ति शुद्धीकरणसम्बन्धी आरोपमा पक्राउ गरी प्रहरी हिरासतमा राखिएको थियो । खड्काले विदेश जानुपर्ने अवस्था आएमा अनिवार्य रूपमा अनुमति लिनुपर्ने आदेशमा उल्लेख छ ।

खड्काकी श्रीमती विनिता थापाले दायर गरेको बन्दी प्रत्यक्षीकरणको रिटमाथि सुनुवाइ गर्दै सर्वोच्चले खड्काको पक्राउ र म्याद थप प्रक्रिया कानुनसम्मत नदेखिएको निष्कर्ष निकालेको हो ।

सम्पत्ति शुद्धीकरणसम्बन्धी कसुरमा अनुसन्धानका लागि केन्द्रीय अनुसन्धान ब्यूरो (सीआईबी) ले खड्कालाई पक्राउ गरेको थियो ।