कांग्रेसले बहादुरसिंहलाई बागमतीको मुख्यमन्त्रीबाट बिदा गर्ने, बानियाँको नेतृत्वमा सरकार बनाउने तयारी

काठमाडौं । बागमती प्रदेश सरकारका मुख्यमन्त्रीदेखि मन्त्रीहरुको सेटै परिवर्तन हुने भएको छ ।

बागमती सरकारका मुख्यमन्त्री बहादुरसिंह लामाको कामकारबाहीबाट नेपाली कांग्रेसका सभापति शेरबहादुर देउवा असन्तुष्ट छन् । र, उनी मुख्यमन्त्रीमा इन्द्रबहादुर बानियाँलाई बागमती प्रदेश सरकारको मुख्यमन्त्री बनाउने निष्कर्षमा पुगिसकेको कांग्रेसकको देउवा समूहका एक केन्द्रीय सदस्य बताउँछन् ।

गएको प्रतिनिधिसभा निर्वाचनमा मकवानपुर क्षेत्र नं. १ बाट महालक्ष्मी डिना उपाध्यायलाई अन्तर्घात गरी पराजीत गराएको आरोप लागेपछि सभापति देउवाले उनलाई मुख्यमन्त्री नबनाई बहादुरसिंह लामालाई बनाएका थिए । तर यसबीचमा लामाले देउवा दम्पत्तिलाई खुसी बनाउन सकेनन् । बानियाँले भने डिनालाई अन्तर्घात गरेकोमा क्षमा माग्दै देउवाको मन जित्दै गए ।

स्रोतका अनुसार कांग्रेस सभापति देउवा बागमती प्रदेशको बजेट पारित हुनासाथ मुख्यमन्त्रीदेखि मन्त्री परिवर्तन गर्ने र इन्द्रबहादुर बानियाँको नेतृत्वमा सरकार गठन गर्ने निष्कर्षमा पुगिसकेका छन् ।
लामासँग असन्तुष्ट रहेका देउवालाई गएको असार १ गते आर्थिक मामिला मन्त्री कुन्दन काफ्लेले प्रस्तुत गरेको बजेटले झन् आक्रोशित बनाएको छ । काफ्लेले बजेटमा गरेको अचाक्लीले पनि देउवालाई थप चिढ्याउने काम गरेको बताइएको छ ।

काफ्लेले पहिरो नियन्त्रण, पर्यटन पदमार्ग जस्ता कमिसनमुखी योजना बनाएर तिनमा मात्र बजेटको ठूलो हिस्सा छुट्याएपछि कांग्रेसबृत्तमा त्यसलाई ‘टंकी बजेट’को संज्ञा दिइएको छ । टंकी अर्थात् काम नै नगरी भुक्तानी दिने र ५० प्रतिशत मन्त्री काफ्लेले नै लिने गरी यस्ता अनावश्यक शीर्षकमा बजेटको ठूलो हिस्सा छुट्याइएको आरोप छ ।

कांग्रेसले बागमती सरकारको नेतृत्वसहित मन्त्रीको सेटै परिवर्तन गर्ने भएकाले एमालेका पनि परिवर्तन हुने चर्चा छ ।