हंसपुरका वडाध्यक्ष र प्रमुख प्रशासकीय अधिकृतसहित चार जनाविरुद्ध भ्रष्टाचार मुद्दा दायर

काठमाडौं। अख्तियार दुरुपयोग अनुसन्धान आयोगले धनुषाको हंसपुर नगरपालिका-१ भगवानपट्टीको पोखरी ठेक्का लगाउँदा भ्रष्टाचार गरेको आरोपमा वडाध्यक्ष कामेश्वर कापरसहित चार जनाविरुद्ध भ्रष्टाचार मुद्दा दायर गरेको छ । पोखरी ठेक्काको रकम हिनामिना गरेको भन्दै आयोगले आज विशेष अदालतमा मुद्दा दायर गरेको हो ।

मुद्दा दायर हुने अन्यमा प्रमुख प्रशासकीय अधिकृत केशवकुमार अधिकारी र ठेकेदारहरु मदनकुमार झा र नवीनकुमार चौधरी रहेका छन् ।

सार्वजनिक पोखरी ठेक्कामा लगाएवापत दोस्रो वर्षको रकम ५ लाख ५५ हजार रुपैयाँ राजस्वमा दाखिला गर्नुपर्नेमा वडाध्यक्ष कापरले आफैंसँग राखेको पाइएको अख्तियारले जनाएको छ ।

तत्कालिन प्रमुख प्रशासकीय अधिकृत केशवकुमार अधिकारीले नगरकार्यपालिकाको बैठकले निर्णयमा नगरेको कुरा गरेको भनी सरकारी कागज सच्याएको अख्तियारले बताएको छ ।