कर्मचारीको बिरोधपछि खानेपानीका सचिव साहको ६ महिनामै सरुवा

काठमाडौं । खानेपानी मन्त्रालयका सचिव रामआधार साहलाई सरकारले राष्ट्रिय सतर्कता केन्द्रमा सरुवा गरेको छ । बिहीबार बसेको मन्त्रिपरिषद बैठकले ७ सचिवको सरुवा गर्दा साह सतर्कतामा पुगेका हुन् । साह गएको जेठ अन्तिममा खानेपानी मन्त्रालयको सचिवमा सरुवा भएका थिए ।

साहको कार्यशैलीलाई लिएर मातहतका कर्मचारीहरु हैरान भएका थिए । सहसचिवदेखि मुनिका कर्मचारीलाई कार्यकक्ष प्रवेशमै रोक लगाएका साहले मन्त्री महिन्द्र राय यादवलाई समेत छल्दै आर्थिक चलखेल गर्ने गरेको आरोप छ । मन्त्री यादवसमेत उनीसँग रुष्ट थिए ।

मन्त्रालयको कर्मचारी प्रशासन महाशाखाको प्रमुखको रुपमा सहसचिव अर्जुन गौतम र सचिवको आर्थिक मोहले गर्दा मेलम्चीको काममा बिलम्ब हुँदै गएको गुनासो प्रधानमन्त्री पुष्पकमल दाहाल ‘प्रचण्ड’सम्म पुगेको थियो । त्यतिमात्र होइन, खानेपानी विभाग, काठमाडौं उपत्यका खानेपानी लिमिटेड, आयोजना कार्यान्वयन इकाईदेखि सबै मातहतका निकायका प्रमुखसँग सचिवले खुलेआम बजेट हेर्दै प्रतिशत मागेपछि कर्मचारी दिक्क थिए ।

त्यस्तै खानेपानी विभाग र अन्तर्गतका आयोजना प्रमुखदेखि आयोजना कार्यान्वयन निर्देशनालयका र मेलम्ची खानेपानी आयोजनाका प्रमुखहरु सचिवको भाग बुझाउन नसकेर वाक्कदिक्क थिए । काठमाडौंमा पानी पठाउनुपर्ने बेलामा खानेपानी मन्त्रालय भने मर्मत र सुधारका नाममा मेलम्ची खानेपानी आयोजनामा करोडौं बजेट छु्ट्याएर कमिसन खान तल्लीन भएको आरोप लागेका थियो । केही दिनअघि मन्त्री र सचिवको नेतृत्व बास बस्न मेलम्ची खानेपानी आयोजना स्थल पुगेको थियो ।

सचिव साहको कमिसनमोहनबाट सिंचाई मन्त्रालयमा हुँदा भर्याङ उक्लिंदा नै घुस माग्ने गरेको आरोप लागेका मन्त्री यादवसमेत खुसी थिएनन् । उनी पनि सचिव फेर्ने दाउमा थिए ।
सचिव साह गुणस्तर तथा नापतौल विभागको करिब ७ बर्ष महानिर्देशक हुँदा पेट्रोल पम्पमा ठगी मेसिन जडान गरी घुस लिने गरेको आरोपमा पक्राउ नै परेका थिए । तर पछि अदालत सेटिङ गरी उनी छुटेका थिए ।