खानेपानी सचिव साहको सरुवाः सिग्देललाई ऊर्जाको जिम्मा

काठमाडौं । खानेपानी मन्त्रालयका सचिव रामआधार साहलाई सरकारले राष्ट्रिय सतर्कता केन्द्रमा सरुवा गरेको छ । बिहीबार बसेको मन्त्रिपरिषद बैठकले सतर्कता केन्द्रका सचिव सुरेश आचार्यलाई खानेपानी मन्त्रालयमा सरुवा गरेको छ ।

त्यसैगरी ऊर्जा सचिवमा सोही मन्त्रालयको सिंचाईतर्फका गोपालप्रसाद सिग्देलको सरुवा भएको छ । सिंचाईमा सुशीलचन्द्र तिवारीलाई ल्याइएको छ । तिवारी जल तथा ऊर्जा आयोगमा थिए ।
कोशी प्रदेशका प्रमुख सचिव डा. दीपक काफ्लेलाई संस्कृति, पर्यटन तथा नागरिक उड्डयन मन्त्रालयमा सरुवा गरिएको छ ।

पर्यटन सचिव रहेका भरतमणि सुवेदीको सार्वजनिक खरिद अनुगमन कार्यालयमा सरुवा भएको छ । दीपक काफ्ले कोशी प्रदेशबाट १६ महिनामा काठमाडौंमा आउन पाएका छन् । यसअघि मुकुन्द निरौला बागमती प्रदेशमा १७ महिना कार्यकाल बिताएर उद्योगमा सरुवा भएका थिए ।

त्यसैगरी, सचिवमा बढुवा भएकी सेवा लम्साललाई परराष्ट्र मन्त्रालयमा पदस्थापन गरिएको छ ।

मुख्यसचिव बैकुन्ठ अर्यालले परिवारकै दबाबका बाबजुद पनि सरिता दवाडीलाई सिंचाई मन्त्रालयमा पदस्थापन गर्न सकेनन् । दवाडीलाई जल तथा ऊर्जा आयोगमा पदस्थापन गरिएको छ ।

दवाडीलाई सचिवमा बढुवापछि सिंचाईमा पदस्थापन गर्ने अनुमान गरिएको थियो । तर आफन्तलाई बढुवा हुनासाथ मन्त्रालय दिएको आरोप लाग्नसक्ने भएकाले मुख्यसचिव अर्यालले आयोगमा पदस्थापन गरेका छन् ।