दुईथरी जन्ममिति देखिएपछि उपरथी सिग्देलमाथि छानबिनः सेनाको रथी बढुवा अलपत्र

काठमाडौं । सेवा प्रवेश र बढुवामा उमेर र शैक्षिक प्रमाणपत्र विवादमा परेका सैनिक अधिकारीबिरुद्ध जंगीअड्डाले कठोर नीति लिने भएको छ ।

जागिर खान नक्कली प्रमाणपत्र पेस गर्ने र माथिल्लो पदसम्म पुग्न नागरिकतामा जन्ममिति हेरफेर गर्नेहरू कडा सजायको भागीदार हुन थालेका छन् । जसको पछिल्लो उदाहरण हुन्, प्रधानसेनापतिका दाबेदार उपरथी ताराध्वज पाण्डे । नागरिकता विवादमा परेपछि पाण्डेले राजीनामा दिएका छन् । उनको राजीनामासँगै प्रधानसेनापतिको लाइनमा रहेका अर्का उपरथी अशोकराज सिग्देलको पनि जन्ममिति दुईथरी रहेको खुलासा भएको छ ।

स्रोतका अनुसार उपरथी पाण्डेको दुईथरी जन्ममिति रहेको खुलेपछि हाल उनीबिरुद्ध आन्तरिक छानबिन भइरहेको छ । सोही कारण सेनाले रिक्त रथी पदमा बढुवाको सिफारिस गर्न सकेको छैन । शैक्षिक प्रमाणपत्रमा सिग्देलको जन्म मिति १९ माघ २०२१ रहेको छ । तर, नागरिकतामा १९ माघ २०२३ राखेका छन् । यही प्रकृतिको विवादमा ताराध्वज पाण्डेले राजीनामा दिइसकेका छन् । पाण्डेलाई लागू हुने नीति सिग्देलको हकमा लागू हुने हो भने उनले पनि राजीनामा दिनुको बिकल्प छैन । यदि जन्ममिति विवादमा सिग्देलले राजीनामा नदिएमा एउटै कसुरमा कसैलाई ऐन कसैलाई चैन भन्ने उक्ति लागू हुनेछ ।

यसअघि पूर्णचन्द्र थापा प्रधानसेनापति हुँदा जंगीअड्डाले छानबिन गरे पनि पाण्डे र सिग्देलहरुलाई भने उन्मुक्ति दिइएको थियो । उपरथीबाट बढुवा हुने बेलामा पाण्डे र सिग्देलको पनि नागरिकतामा जन्ममिति फरक रहेको खुल्यो । पाण्डेले राजीनामा दिइसके पनि सिग्देल भने अझै पनि बढुवा हुने दाउमा छन् । यद्यपि जंगी अड्डाले सिग्देलको जन्ममिति विवादका कारण रथी बढुवा प्रक्रिया अगाडि बढाउन आँट गर्न सकेको छैन । जसका कारण नेपाली सेनाको भावी नेतृत्व छनोटमा समस्या देखिएको छ ।

सेनामा रथीका दुईमध्ये एक पद एक महिनादेखि रिक्त छ । रिक्त एक रथीका लागि पाण्डे बाहिरिएसँगै बरिष्ठतम् उपरथी अशोक सिग्देल दाबेदार हुन् । उनको पनि पाण्डेकै जस्तो दुईथरी जन्ममिति भएकाले छानबिन भइरहेको छ ।