एमालेको लुम्बिनी प्रदेश अधिवेशन आजदेखि सुरु

काठमाडौँ। प्रमुख प्रतिपक्षी नेकपा एमालेको लुम्बिनी प्रदेशको पहिलो अधिवेशन आजदेखि बुटवलमा सुरु हुँदैछ ।

अधिवेशनको पार्टी अध्यक्ष केपी शर्मा ओलीले मध्याह्न साढे १२ बजे बुटवलको अन्तर्राष्ट्रिय सम्मेलन केन्द्रको परिसरमा उद्घाटन गर्ने कार्यक्रम रहेको छ ।

मुलुक संघीयतामा लागू भएसँगै तयार भएको संरचनात्मक संगठन अनुसार पहिलो पटक हुन लागेको प्रदेश अधिवेशनलाई चासोका साथ हेरिएको छ ।

अधिवेशन अन्तर्गत आज उद्घाटनसत्र हुनेछ भने भोलिदेखि बन्दसत्र हुनेछ । उद्घाटन समारोहमा पार्टीका उपाध्यक्षहरू युवराज ज्ञवाली र विष्णुप्रसाद पौडेल, महासचिव शंकर पोख्रेल, उपमहासचिव प्रदीप ज्ञवाली, सचिवहरु गोकर्ण विष्ट, छविलाल विश्वकर्मा एवं प्रदेशका इन्चार्ज पदमा अर्यालका साथै पोलिटब्युरो सदस्यहरू, केन्द्रीय सदस्यहरू, केन्द्रीय आयोगका पदाधिकारी तथा सदस्यहरूको उपस्थिति रहने छन् ।

उक्त अधिवेशनका लागि प्रदेशका १२ वटै जिल्लाका ८२ हजार ८९५ पार्टी सदस्यहरूबाट छानिएका प्रतिनिधि तथा विभिन्न २३ वटा जनसंगठनहरुबाट छानिएका गरी एकहजार चारजना प्रतिनिधि सहभागी हुने छन् ।