राप्रपाको केन्द्रीय कार्यालय भवन तीन दिनभित्र खाली गर्न महानगरको निर्देशन

काठमाडौं । काठमाडौं महानगरपालिकाले राष्ट्रिय प्रजातन्त्र पार्टी (राप्रपा)को धुम्बाराही स्थित केन्द्रीय कार्यालय भवन आगामी सोमबारसम्म खाली गर्न आदेश दिएको छ । महानगरका कर्मचारीहरुले कार्यालय भवन अगाडि पुगेर आज तीन दिनभित्र उक्त भवन खाली गर्न भन्दै माइकिङ गरेका थिए ।

राप्रपाका मुख्यसचिव केदारबहादुर अधिकारीले महानगरका कर्मचारीहरुले भवन खाली गर्न भने पनि कारण नखुलाएको बताए ।

‘उहाँहरुले माइकिङ गर्नुभएको थियो, तर लिखितरुपमा केही पनि दिनुभएको छैन । हामीले केकति कारणले खाली गर्नुपर्ने भनेर लिखित पत्र मागेका छौं,’ अधिकारीले भने ।

धुम्बाराहीमा करिब १० रोपनी क्षेत्रफलमा रहेको २ तल्ले घर राप्रपाले २०६९ सालदेखि प्रयोग गर्न थालेको हो । यो घरको नक्शापास नभएको बुझिएको छ ।