निर्वाचन आयोगले भोलि राष्ट्रपतिलाई निर्वाचन प्रतिवेदन बुझाउने

काठमाडौं । निर्वाचन आयोगले मंसिर ४ गते सम्पन्न प्रतिनिधिसभा सदस्य निर्वाचनको प्रतिवेदन भोलि बिहीबार राष्ट्रपतिसमक्ष बुझाउने भएको छ । प्रमुख निर्वाचन आयुक्त दिनेशकुमार थपलियाले बिहीबार राष्ट्रपति विद्यादेवी भण्डारीसमक्ष प्रतिवेदन पेस गरिने जानकारी दिए। 

बहादुर भवनस्थित कार्यालयमा पत्रकार सम्मेलन गर्दै आयोगले प्रतिवेदन बुझाउने तयारीबारे जानकारी दिएको हो।

प्रदेशसभा सदस्य निर्वाचनको प्रतिवेदन भने आउँदो पुस २ गते प्रदेश प्रमुखहरूलाई बुझाइने उनले जानकारी दिए ।

मंसिर ४ गते सम्पन्न प्रतिनिधिसभा र प्रदेशसभा निर्वाचनबाट २७५ जना सांसदहरु नि‍र्वाचित भएका छन्। १६५ जना प्रत्यक्षबाट र ११० समानुपातिक तर्फबाट निर्वाचित भएका हुन्।