बोरिङ जडान गर्न ८ लाख २१ हजार घुस, सिंचाई प्रमुख ढकालसहित २ जना पक्राउ

काठमाडौं । बोरिङ र मोटर जडान गर्ने कार्यका लागि ७ लाख ५० हजार घुस लिने भूमिगत जलश्रोत तथा सिंचाई विकास डिभिजन कार्यालय सर्लाहीका डिभिजन प्रमुखसहित २ जनालाई अख्तियार दुरुपयोग अनुसन्धान आयोगले नियन्त्रणमा लिएको छ । साथै उनीहरुको साथबाट स्रोत नखुलेको थप ७१ हजार १ सय १५ रुपैयाँसमेत अख्तियारको टोलीले बरामद गरेको छ । घुस लिएको र स्रोत नखुलेको रकमसमेत ८ लाख २१ हजार १ सय १५ रुपैयाँ अख्तियारले बरामद गरेको छ ।

जलश्रोत तथा सिंचाई विकास डिभिजन कार्यालय सर्लाहीका डिभिजन प्रमुख अनुपमा ढकाल र मेकानिकल अधिकृत छैंटौ तुलाकान्त चौधरीलाई घुससहित अख्तियारको बर्दिबासबाट खटिएको टोलीले शुक्रबार नियन्त्रणमा लिएको हो ।

मिलेमतोमा बोरिङ र मोटर जडान गर्ने कार्य सम्पन्न पश्चात सोवापतको रकम भुक्तानी गर्ने क्रममा दुःख हैरानी दिई सेवाग्राहीसँग घुस माग गरेको उजुरीका आधारमा अख्तियारको टोलीले ढकाल र चौधरीलाई सेवाग्राहीबाट रू. ७ लाख पचास हजार रुपैयाँ घुस लिइसकेको अवस्थामा उक्त रकम एवं श्रोत नखुलेको ७१ हजार १ सय १५ रुपैयाँसहित पक्राउ गरेको आयोगका प्रवक्ता सुरेश न्यौपानेले जारी गरेको बिज्ञप्तिमा उल्लेख छ ।

ढकाल र चौधरीको साथबाट मोबाइल ३ थानस वागमती नगरपालिका वडा नं. १२ स्थित भूमिगत जलश्रोत तथा सिंचाई विकास डिभिजन कार्यालय प्रमुखको क्वाटरबाट नियन्त्रणमा लिएको आयोगले जनाएको छ ।