काठमाडौं महानगरपालिकाका लागि ७३७ जना प्राथमिक उपचारक तयार

काठमाडौ । काठमाडौं महानगरपालिकाको आर्थिक र नेपाल रेडक्रस सोसाइटी काठमाडौं  जिल्ला शाखाको प्राविधिक सहयोगमा काठमाडौं महानगरपालिकाका ३२ वटै वडामा संचालन गरेको आधारभूत प्राथमिक उपचार तालिमबाट ७३७ जना प्राथमिक उपचारक तयार भएका छन् ।

तालिमको समीक्षा एवं प्रशिक्षकहरुलाई प्रशंसापत्र हस्तान्तरणका लागि आयोजित कार्यक्रममा जिल्ला सभापति श्यामकाजी डोटेलले उक्त जानकारी दिनुभएको हो । तालिमप्राप्त जनशक्तिमा महिला ५७१ र पुरुष १६६ रहेका छन् ।

कार्यक्रममा काठमाडौं महानगरपालिकाका प्रवक्ता नवीन मानन्धर, नेरेसो केन्द्रीय तदर्थ समितिका सदस्य प्रेम लामा, महानगर स्वास्थ्य विभाग प्रमुख दीपककुमार केसी, नेरेसो बागमती प्रदेश महासचिव रामजी पौडेल, जिल्ला शाखा मन्त्री वृद्धिमान शाक्य, कोषाध्यक्ष लक्ष्मीरत्न तुलाधरले तालिमका सम्बन्धमा आफ्ना अनुभव राख्नुभएको थियो ।

समीक्षा कार्यक्रममा तालिमका सहभागी, प्रशिक्षक, उपशाखा प्रतिनिधिहरुले विभिन्न सुझावहरु राख्नुभएको थियो । महानगरसँगको सम्झौता पश्चात् ९४ दिनको अवधिमा नेरेसो काठमाडौ जिल्ला शाखा महानगरका वडाहरु तालिम संचालनका लागि परिचालन हुनुभएका १७ जना प्रशिक्षकहरुलाइ प्रसंशापत्र प्रदान गरिएको थियो ।