बाबुरामको प्रचण्डलाई प्रस्ताव -आगामी चुवावमा संयुक्त मोर्चा बनाएर एउटै चिन्हमा निर्वाचन लडौं

काठमाडौं । नेपाल समाजवादी पार्टीका अध्यक्ष डा.बाबुराम भट्टराईले आगामी निर्वाचनमा संयुक्त मोर्चा बनाएर एउटै चिन्हमा लड्नको लागि माओवादी केन्द्रका अध्यक्ष पुष्पकमल दाहाल प्रचण्डलाई प्रस्ताव गरेका छन् ।  आज  माओवादी केन्द्रका अध्यक्ष पुष्पकमल दाहाल प्रचण्ड ,  नेता नारायणकाजी श्रेष्ठ र नेपाल समाजवादी पार्टीका अध्यक्ष डा.बाबुराम भट्टराईबीच भेटवार्ता भएको  हो ।

ललितपुरको हात्तीवनस्थित प्रचण्डको भान्जाको घरमा भेटवार्ता भएको हो । भेटमा आगामी आम निर्वाचनमा मोर्चा बनाएर जाने बारे छलफल भएको प्रचण्डको सचिवालयले जनाएको छ ।
 भेटका क्रममा नेकपा माओवादी केन्द्र र एकीकृत समाजवादीले चुनावी मोर्चा बनाउने बारे छलफल गरिरहेको बेला नेपाल समाजवादी पार्टी पनि उक्त मोर्चामा सहभागी हुने प्रस्ताव बैठकमा डा. बाबुराम भट्टराईले गरेका छन् ।
उनले आगामी चुनावमा संयुक्त मोर्चा बनाएर एउटै चुनाव चिन्हमा निर्वाचनमा सहभागी हुनेबारे प्रस्ताव गरेको बुझिएको छ ।

एउटै चुनाव चिन्ह बनाउनेबारे गठबन्धनमा रहेका र मोर्चामा सहभागी हुन सक्ने अन्य दलका नेतासँग पनि छलफल गर्ने निष्कर्षमा तीन नेताहरू पुगेको बताइएको छ ।