कुनै लिष्ट बाँडिएको छैन, भ्रममा नपरी विवेक प्रयोग गरी मतदान गर्नुहोस् : गगन थापा

काठमाडौं । नेपाली कांग्रेसको १५ औँ महाधिवेशनअन्तर्गत केन्द्रीय कार्यसमितिका लागि मतदान प्रक्रिया सुरु भएको छ । बिहीबार सुरु हुने भनिएको मतदान प्राविधिक कारण बिलम्ब हुन पुगेको छ ।

निर्वाचनको पूर्वसन्ध्यामा पार्टी सभापति गगनकुमार थापाले लिष्ट बाँडेको प्रचार प्रसार भइरहेको छ । तर पार्टी सभापति थापाले कुनै लिष्ट नबाँडिएको प्रष्टीकरण दिंदै त्यस्ता अफवाह नलाग्न सबै महाधिवेशन प्रतिनिधिलाई आग्रह गरेका छन् ।

सम्पूर्ण महाधिवेशन प्रतिनिधि कुनै पनि भ्रम वा प्रभावमा नपरी पार्टीको सर्वोपरि हितलाई ध्यान दिई आफ्नो स्वतन्त्र विवेक, मूल्याङ्कन र विश्वासका आधारमा मतदान गर्न सभापति थापाले आग्रह गरेका छन् ।

मतदान सुरु भएपछि शुक्रबार बिहान उनले सामाजिक संजालमा लेखेका छन्–हिजोका लागि तय भएको निर्वाचन प्राविधिक कारणले एक दिन ढिलो हुन पुग्यो । यसबाट सम्पूर्ण महाधिवेशन प्रतिनिधि साथीहरूमा पर्न गएको असुविधाप्रति क्षमा चाहन्छौँ ।

यस महत्त्वपूर्ण लोकतान्त्रिक अभ्यासमा सम्पूर्ण महाधिवेशन प्रतिनिधि साथीहरूलाई मर्यादित, संयमित र उत्साहपूर्ण ढङ्गले सहभागी हुन आग्रह गर्दछु ।

यसैबीच, विभिन्न उम्मेदवारहरूको सूचीलाई मेरो नामसँग जोडेर प्रचारप्रसार भइरहेको कुरा सुन्न र देख्न आएको छ ।

यस सन्दर्भमा स्पष्ट हुन आग्रह गर्दछु । यो पार्टीभित्रको स्वस्थ आन्तरिक लोकतान्त्रिक प्रक्रिया हो। यसपटक कुनै पनि प्यानल वा गुट छैन ।

मेरो नाम जोडेर आएको लिष्ट भनी प्रचार गरिएका कुनै पनि उम्मेदवारहरूको सूचीलाई मेरो आधिकारिक समर्थन वा सिफारिसका रूपमा नबुझिदिनुहुन होला। कुनै पनि अफवाहमा नलाग्नुहोला ।

सम्पूर्ण महाधिवेशन प्रतिनिधि साथीहरूलाई कुनै पनि भ्रम वा प्रभावमा नपरी पार्टीको सर्वोपरि हितलाई ध्यान दिई आफ्नो स्वतन्त्र विवेक, मूल्याङ्कन र विश्वासका आधारमा मतदान गर्न म आग्रह गर्दछु ।

मलाई विश्वास छ, तपाईंहरूको विवेकपूर्ण निर्णयले पार्टी संगठनलाई नयाँ उचाइमा पुर्‍याउनेछ ।’
जय नेपाल १