कांग्रेसको केन्द्रीय समिति बैठक आज पनि बस्ने

काठमाडौं । चुनावको समीक्षा र सभापति गगनकुमार थापाको राजीनामाबारे निर्णय गर्नेगरी बोलाइएको नेपाली कांग्रेस केन्द्रीय कार्यसमितिको बैठक आज पनि बस्दैछ । बैठक बिहान ११ बजे पार्टी केन्द्रीय कार्यालयमा बस्न लागेको हो ।

कार्यवाहक मुख्यसचिव कृष्णप्रसाद दुलालका अनुसार मंगलबारदेखि पार्टी केन्द्रीय कार्यालय बीपी स्मृति भवन ललितपुरमा जारी बैठकमा विभिन्न ११ प्रस्तावमाथि छलफल चलिरहेको छ ।
मंगलबार कांग्रेस सभापति गगनकुमार थापाको सभापतित्वमा सुरु भएको बैठकमा महामन्त्री प्रदीप पौडेलले ११ प्रस्ताव प्रस्तुत गरेका थिए ।

बैठकमा समसामयिक, सुशासन स्थापना, संविधान संशोधन अध्ययन तथा सुझावका लागि विज्ञसहितको समिति गठन, पार्टीको १५ औँ महाधिवेशनको कार्यतालिका, केन्द्रीय निर्वाचन समिति गठनको बारेमा छलफल हुँदैछ ।