भाडा नतिर्ने भृकुटीमण्डपका २० वटा सटरमा ताला, रिपोर्टर्स क्लवको मात्रै ७३ लाख बाँकी

काठमाडौँ । समाज कल्याण परिषद्ले भृकुटीमण्डपभित्र कार्यालय र व्यवसाय सञ्चालन गरेर भाडा नतिर्ने ऋषि धमला अध्यक्ष रहेको रिपोर्टर्स क्लव नेपालसहित २० वटा सटरमा सोमबार ताला लगाएको छ ।

परिषद्ले लामो समयदेखि भाडा बक्यौता बाँकी रहेका रिपोटर्स क्लव, नेपाल पत्रकार महासंघ काठमाडौं शाखा, उपभोक्ता मन्चसहितका कार्यालय र व्यवसाय सञ्चालन गरेका संरचनामा ताला लगाएको हो । सटरको बक्यौता बुझाउनका लागि पटक–पटक सूचना जारी गर्दा समेत भाडा तिर्न अटेर गरेकाले ताला लगाइएको परिषद्ले जनाएको छ ।

काठमाडौं पुस्तकालय, फोटो पत्रकार महासंघ, अपाङ्ग महासंघ लगायत २० वटा संरचनामा ताला लगाइएको परिषद्का सदस्य सचिव सरोजकुमार शर्माले जानकारी दिएका छन् । हाल १० करोड भन्दा बढी भाडा उठ्न बाँकी रहेको छ । रिपोर्टर्स क्लवले मात्रै करिब ७३ लाख भाडा बुझाउन बाँकी छ ।

२०७२ बैशाख १२ को विनाशकारी भूकम्पपछि धमलाले भृकुटीमण्डपमा रहेको समाजकल्याण परिषदको सटर भाडामा लिएका थिए । भाडामा लिएदेखि नै उनले नतिरी राजनीतिक नेताहरुको शक्ति देखाउँदे तिर्न अटेरी गर्दैआएका थिए ।

रौतहट ४ बाट गएको फागुन २१ को प्रतिनिधिसभा चुनावमा ६५३ मत ल्याएका धमला पछिल्ला दिनमा प्रधानमन्त्री वालेन्द्र शाह र रास्वपा सभापति रवि लामिछानेको जयजयकार गर्दै टीभीदेखि युटयुबमा अन्तर्वार्ता दिंदैआए पनि उनको सटरमा ताला लगाइएको छ ।