समाजकल्याण परिषदका सदस्य सचिव भट्टलाई नहटाउन अन्तरिम आदेश

काठमाडौं । सरकार फेरिनेबित्तिकै अघिल्लो सरकारका पालामा नियुक्ति पाएकाहरुलाई हटाउने प्रचलन रहँदैआएको छ ।

फरक पार्टीको सरकार आएपछि अघिल्लो सरकारबाट नियुक्तहरुलाई हटाउनु सामान्य जस्तै मानिन्छ । तर महिला, बालबालिका तथा ज्येष्ठ नागरिक मन्त्री सुरेन्द्र आचार्यले आफ्नै पार्टीको सभापति शेरबहादुर देउवा प्रधानमन्त्री हुँदा नियुक्त भएका समाज कल्याण परिषदका सदस्य सचिव मनोज भट्टलाई हटाएका छन् । उनले मन्त्रिपरिषदबाटै निर्णय गराई उनलाई २०८० असोज ५ गते हटाएका हुन् ।

भट्ट २०७८ मंसिर ९ मा सदस्य सचिव नियुक्त भएका थिए । जुन समयमा प्रधानमन्त्री देउवा थिए । नेपाली कांग्रेसबाट राष्ट्रियसभा सांसद तारादेवी भट्टका छोरा हुन् मनोज भट्ट ।

कांग्रेसकै मन्त्री सुरेन्द्र आचार्यले उनलाई हटाएपछि उनले न्याय माग्दै २०८० असोज १८ मा सर्वोच्च अदालतमा रिट दर्ता गरेका थिए । जुन रिटमा सर्वोच्च अदालतले आइतबार सुनुवाइ गर्दै अन्तरिम आदेश दिएको छ ।

न्यायाधीश इश्वर खतिवडाको इजलासले सरकारका नाममा कारण देखाउ आदेश र अन्तरिम आदेश जारी गरेको छ ।  महिला मन्त्री आचार्यले सदस्य सचिव भट्टसँग ठूलै रकम माग गरेको र त्यो नदिएपछि हटाएको स्रोतको दाबी छ ।