सिन्धुपाल्चोक एमालेमा उम्मेदवारी दर्ताकै दिन लफडा, दाँतै फुकाल्ने तहमा पुगे टिकट खोसिएका नेता

काठमाडौं । सिन्धुपाल्चोक क्षेत्र नम्बर १ मा मोहनबहादुर बस्नेतले नेपाली कांग्रेसबाट प्रतिनिधिसभा सदस्यमा टिकट नपाएपछि एमालेबाट सरेश नेपाल अगाडि सरेका छन् ।

सुरुमा टिकट लिन रुची नदेखाएका उनी बस्नेतले टिकट नपाएपछि एकाएक उम्मेदवार हुन पुगेका छन् । सरेशले रुची देखाएपछि सिन्धुपाल्चोक एमालेले तीन पटक उम्मेदवार परिवर्तन गरेको छ ।

अख्तियार दुरुपयोग अनुसन्धान आयोगले टेरामक्स खरिदमा बिशेष अदालतमा भ्रष्टाचार मुद्दा दायर गरेकाले बस्नेतलाई कांग्रेसले टिकट दिएन । बिशेष महाधिवेशनले भ्रष्टाचार आरोपमा निलम्बनमा परेका नेतालाई टिकट नदिने निर्णय गरेकाले बस्नेत रिङआउट भए ।

बस्नेत रिङआउट भएपछि एमालेका उम्मेदवार जिल्ला अध्यक्षसमेत रहेका होमनारायण श्रेष्ठले पाएको टिकट उनीबाट फिर्ता गराई नेपालले लिए । सुरुमा एमालेले आङदोर्जे शेर्पालाई सिन्धुपाल्चोक १ मा टिकट दिएको थियो । शेर्पाबाट जिल्ला अध्यक्ष होमनारायण श्रेष्ठले टिकट खोसे ।

श्रेष्ठलाई टिकट खोस्न लगाएर सरेश नेपालले मंगलबार चौतारामा उम्मेदवारी दिएका छन् । उम्मेदवारी दिनका लागि एमाले पार्टी कार्यालयमा नेता कार्यकर्ता जम्मा भइसकेपछि टिकट खोसिएका आङदोर्जे शेर्पाले सरेश नेपाललाई ‘सिद्धार्थ कटेजमा मोहन बस्नेतसँग भेटेर उम्मेदवार भएको’ आरोप लगाएका थिए । विवाद बढ्दैजाँदा शेर्पाले नेपाललाई दाँत झारिदिन्छु समेत भनेको भिडियो सामाजिक संजालमा भाइरल छ ।

शेर्पाले सुरुमा जिल्ला अध्यक्ष होमनारायण श्रेष्ठलाई नै खोेजेका थिए । तर उनी शेर्पाको रामधुलाईबाट जोगिन जिल्ला प्रशासन कार्यालय सिन्धुपाल्चोकमा प्रमुख जिल्ला अधिकारीकोमा पुगिसकेका थिए । प्रजिअ कार्यालयमा शरण लिएका श्रेष्ठ उम्मेदवारी मनोनयनमा देखिएनन् । र्यालीमा समेत उनी देखापर्न सकेनन् ।

मोहन बस्नेतले टिकट नपाउने भएपछि उनीसँग सिद्धार्थ कटेजमा भेटेको र त्यसपछि आफूले सिधै टिकट नखोसी सुरुमा होमनारायणलाई लिन लगाई नेपालले लिएको शेर्पा पक्षको बुझाइ रहेकोक छ ।

मोहन बस्नेतले टिकट नपाएपछि सरेश उनको सहयोग पाउने कुरामा आशावादी भएर एमालेको टिकट लिएका छन् । तर सिन्धुपाल्चोकमा २०५६ देखि २०७० सम्म कुनै पनि चुनावमा एमालेका उम्मेदवार जिताउनेभन्दा पनि हराउने भूमिका खेलेको आरोप सरेश नेपालमाथि लाग्ने गरेको छ । २०७० को संबिधानसभा चुनावमा एमालेका क्षेत्र नम्बर १ का उम्मेदवार अरुण नेपाललाई अन्तर्घात गरी ३२ मतले हराएर मोहन बस्नेतलाई जिताएको आरोप सरेश नेपालको समूहमाथि लागेको थियो ।

डम्बर अर्यालको संयोजकत्वमा गठित छाानबिन समितिद्वारा जिल्ला कमिटीलाई बुझाएको प्रतिवेदनमा नेपालसहित जिल्ला पार्टी पूर्वअध्यक्ष हस्त पण्डित, २ नं क्षेत्रीय अध्यक्ष होमनारायण श्रेष्ठ र वाग्मती अञ्चल सदस्य सोम सापकोटाले अन्तर्घात गरी एमालेका उम्मेदवार हराएको आरोप लागेको थियो । नेपालले त भिजन नभएको नेतालाई के मत दिनु्, म त मावलतिर लागेँ भन्ने स्टाटस फेसबुकमा लेखेका थिए ।

२०७० को संविधानसभा चुनावदेखि नै एमाले हराउने भूमिका खेलेकाले जिल्लामा पार्टी गुट उपगुट र बिभाजित अवस्थामा छ । समानान्तर कमिटी गठन भएकाले संगठन कमजोर भइसकेको छ । बाह्रबीसे नगरपालिकामा एमालेका दुईवटा कमिटी छन् ।

बाह्रबीसे नगरपालिकाका पूर्वमेयर निमफुन्जो शेर्पाहरुले माधवप्रसाद नेपाल अध्यक्ष रहेको नगर समिति बनाएका छन् । जिल्ला अध्यक्ष होमनारायण र सरेश नेपालहरुले बमबहादुर तामाङ छन् ।

जिल्लाको नेतृत्वले नै पालिकापिच्छे गुटबन्दी गर्दै समानान्तर कमिटी बनाएकाले एमाले सिन्धुपाल्चोकमा मेलमिलाप नहुँदा सरेशलाई निर्वाचनमा निकै चुनौती छ ।

जिल्ला पार्टी कार्यालयमा सरेश नेपाल र आङदोर्जे शेर्पाबीच भएको विवाद