ओलीले बोलाए केन्द्रीय कमिटी बैठक, पदाधिकारी संख्या बढाउने तयारी

काठमाडौं । नेकपा (एमाले)को केन्द्रीय कमिटी बैठक केहीबेरपछि बस्न लागेको छ । अध्यक्ष केपी शर्मा ओलीले बिधान संशोधन गरी पदाधिकारीको संख्या बढाउनका लागि केन्द्रीय कमिटी बैठक बोलाएको बताइएको छ ।

११ औं महाधिवेशनको दोस्रो दिन आज बन्दसत्र १२ बजेदेखि हुने भनिएको थियो । तर अध्यक्ष ओलीले आफ्नो गुटमा भागबण्डा पुर्याउन नसकेपछि पदाधिकारीको संख्या बढाउन केन्द्रीय कमिटी बैठक बोलाएको अनुमान गरिएको छ ।

यसअघि गएको भदौमा भएको बिधान अधिवेशनले एमालेमा पदाधिकारीको संख्या १९ बाट घटाएर १५ मात्र राख्ने निर्णय गरेको थियो । तर बिधान महाधिवेशन भएको तीन महिनामै पुनः पदाधिकारी र केन्द्रीय कमिटीको संख्या बढाउन ओली लागेका थिए ।

शुक्रबारको सचिवालय बैठकमै पदाधिकारी संख्या बढाउने पक्षमा रहेका ओली सो दिन असफल भएका थिए । ओली समूहमा बिष्णु पौडेल, रामबहादुर थापा बादल, शंकर पोखरेल, रघुवीर महासेठ, प्रदीप ज्ञवाली, बिष्णु रिमाल, लेखराज भट्ट, पदमा अर्यालको ब्यवस्थापन गर्नका लागि उनले पदाधिकारी संख्या बढाउन खोजेका छन् ।