घुसकाण्डमा मुछिएका दुई मन्त्री हटाउन प्रधानमन्त्री ओलीको आलटाल, चौतर्फी बिरोध

काठमाडौं । घुसको डिल गरेको अडियो सार्वजनिक भएको एक साता बितिसक्दा पनि प्रधानमन्त्री केपी शर्मा ओलीले संघीय मामला तथा सामान्य प्रशासनमन्त्री राजकुमार गुप्ता र भूमिब्यवस्था, सहकारी तथा गरिबी निवारण मन्त्री बलराम अधिकारीलाई हटाउन आलटाल गर्दैआएका छन् ।

पोखराका जग्गा कारोबारी सुजन लामाले मालपोत कार्यालय कास्कीका तत्कालीन प्रमुख रामचन्द्र अधिकारीलाई थमौती गर्न र भूमि आयोग कास्कीको अध्यक्षमा खेम पुनलाई बनाउनका लागि सामान्य प्रशासन मन्त्री गुप्तालाई उक्त घुस दिएको अडियो रेकर्डबाट सुनिन्छ ।

अडियो रेकर्डका कुरा आफ्नै भएको मन्त्री गुप्ताले स्वीकार गरिसक्दा पनि प्रधानमन्त्री ओलीले उनलाई बर्खास्त गरेका छैनन् । सामाजिक संजालमा घुस लिने मन्त्रीको बारेमा चौतर्फी बिरोध हुँदाहुँदै पनि ओलीले उनीहरुलाइै बर्खास्त गरेका छैनन् । बरु घुस लेनदेनमा मुछिएका मन्त्री गुप्ताले एक टीभीमा प्रायोजित अन्तर्वार्ता दिएर घुस नलिएको दाबी गरेका छन् । र, अडियोसमेत आफ्नो नभएको भन्न थालेका छन् ।

घुसकाण्डमा प्रत्यक्ष मुछिएका मन्त्री गुप्तालाई राजीनामा गराउने वा उनलाई बर्खास्त गर्ने भन्ने निर्णय भने भएको छैन । घुसकाण्डमा जोडिएका अर्का मन्त्री बलराम अधिकारीलाईसमेत हटाउनुपर्ने आवाज उठिरहेको छ ।

आइतबार प्रधानमन्त्री केपी शर्मा ओली काठमाडौं फर्किएर मन्त्रीद्वयका बारेमा निर्णय गर्ने भनिए पनि सोमबार बिहानसम्म पनि उनीहरुलाई पदबाट हटाइएको छैन ।

पुनलाई भूमि आयोग कास्कीको अध्यक्ष बनाउन २५ लाख र मालपोत कार्यालय कास्कीको तत्कालीन प्रमुख अधिकारीको सरूवा रोक्न ५३ लाख घुस लेनदेनसम्बन्धी डिल गरेको अडियो संचारमाध्यमले सार्वजनिक गरेका छन् ।