राजीनामा दिएका मन्त्री गुप्ता भन्छन्–कहिलेकाहीँ नखाएको बिष पनि लाग्दोरहेछ म त्यसैको शिकार भएँ

काठमाडौं । मालपोत कार्यालय कास्कीका प्रमुख रामचन्द्र अधिकारीको सरुवा रोक्न र भूमि आयोगका अध्यक्षमा खेम पुनलाई नियुक्तिका लागि ७८ लाख घुस डिल गरेका संघीय मामिला तथा सामान्य प्रशासन मन्त्री राजकुमार गुप्ताले पदबाट राजीनामा दिएका छन् ।

मन्त्री गुप्ताले नखाएको बिष पनि लागेको र त्यसको शिकार आफू भएको उल्लेख गरेका छन् । लागेका आरोप अनुसन्धान गरी सत्य तथ्य कुरा बाहिर ल्याउन सहयोग पुगोस् भनेर प्रधानमन्त्रीसमक्ष मन्त्री पदबाट राजीनामा गरेको उनले उल्लेख गरेका छन् ।

गुप्ताले लेखेका छन्–‘बिगत केही दिनअघिदेखि निरन्तर मेरो नाम घुस डिलसँगै जोडेर प्रचारमा आएको कुरा सबैलाइ बिदितै छ ।

कहिलेकाहीँ नखाएको बिष पनि लाग्दोरहेछ म अहिले त्यसैको शिकार भएँ । अब लागेका आरोप अनुसन्धान गरी सत्यतथ्य कुरा बाहिर ल्याउन सहयोग पुगोस् भनेर सम्माननीय प्रधानमन्त्रीसमक्ष सामान्य प्रशासन मन्त्री पदबाट राजीनामा गरेको छु ।

प्रबिधिको उच्चतम प्रयोगको शिकार अब अरु कोही पनि नबनून् भन्ने अपेक्षा गर्दै आजसम्मा बिभिन्न रुपले आफूलाई सहयोग गर्नुहुनेहरुलाइ हार्दिक धन्यबाद ब्यक्त गर्दछु ।
अब फेरि एकपटक देश र जनताप्रति थप जिम्मेवारीबोधका साथ पार्टीले दिएको जिम्मेवारी इमान र निष्ठाका साथ पूरा गर्ने प्रतिबद्धताका साथ जनताको घर दैलोमा आउने प्रण गर्दछु ।’