रसुवा भन्सारका चार कर्मचारी तानिए, भन्सार प्रमुख भट्टराईलाई उन्मुक्ति ?

काठमाडौं । भन्सार कार्यालयबाट आयातकर्ता ब्यापारीहरुले गुणस्तर र परिमाणमा तलमाथि गरी सामान ल्याउने गरेका घटना त प्रायः भइरहेका छन् । तर प्रज्ञापनपत्रमा एउटा सामान उल्लेख गरिएको र सोही अनुसार नै घोषणा गरी भन्सारका कर्मचारीहरुले चेकजाँच गरिसकेको कन्टेनरमा अरु नै सामान भेटिएपछि भन्सारदेखि राजस्व अनुसन्धान विभागका अधिकारीहरुलाई झस्काएको छ ।

गएको मंसिर पहिलो साता राजस्व अनुसन्धान विभागले रसुवा भन्सारबाट जाँचपास भई छुटेको कन्टेनरमा घोषणा गरेको सामानभन्दा फरक सामान फेलापारेको थियो । राजस्वले बरामद गरेको कन्टेनरमा रसुवा भन्सारमा घोषणा गरेको सुटकेस र सिरक झिकेर जुत्ता प्याकिङ गरेको भेटिएको थियो । भन्सार चेकजाँचपछि ब्यापारी बुद्ध लामाले सिल तोडेर सिरक र सुटकेश झिकेर जुत्ता हाली अर्को सिल लगाएको आरोप कर्मचारीहरुले लगाएका छन् । भन्सारले सिल लगाएको कन्टेनरमा अर्को गाडीको सामान कसरी राखियो भन्ने बिषयमा राजस्वले अनुसन्धान गरिरहेको छ । भन्सार परिसरमै सिल तोडेर जुत्ता लोड गरिएको खुलेको छ ।

रसुवा भन्सारबाट आयात भएको कन्टेनरमा मालबस्तु नै फेरेर अर्कै सिल लगाएको कन्टेनर बरामद भएपछि भन्सार बिभागले जाँचकीसहित ४ कर्मचारीलाई तानेको छ । तानिएका कर्मचारीहरुमा नायबसुब्बा लोकबहादुर बिष्ट, अधिकृतत्रय हंस रावल, शिवओम श्रेष्ठ र नगेन्द्र जैसी छन् ।

४ कर्मचारी तानिए पनि भन्सार कार्यालय रसुवाका प्रमुख भन्सार अधिकृत तुलसीप्रसाद भट्टराईलाई भने कुनै एक्सन लिएको छैन । जबकि यसअघि परिमाणमा सामान्य तलमाथि हुँदा तत्कालीन कार्यालय प्रमुख नारायण भण्डारीसहितका कर्मचारीहरुलाई तानिएको थियो । तर सिल नै तोडिएको अवस्थामा राजस्व अनुसन्धान बिभागले कन्टेनर बरामद गरिसकेको अवस्थामा कार्यालय प्रमुखलाई जोगाएर नासु र अधिकृतहरुलाई मात्र बलीको बोका बनाउन लागिएको छ ।

भन्सार कार्यालय रसुवाका प्रमुख भन्सार अधिकृत भट्टराई भने तानिएका ४ कर्मचारीलाई पनि ब्यापारीको टाउकोमा दोष सबै थोपेर पुनः रसुवा फर्काउन अहोरात्र लागिरहेका छन् ।

कसरी गरियो सामान फेरबदल ?

घोषणा गरेको सामान झिकेर ब्रान्डेड जुत्ता लोड गरी नक्कली सिल लगाउने ब्यापारी बुद्ध लामालाई राजस्व अनुसन्धान विभागले पक्राउ गरी अनुसन्धान गरिरहेको छ ।

लामाले आफ्नै नाममा रहेको वजन इन्टरप्राइजेजबाट सामान आयात गरेका थिए । प्रज्ञापनपत्रमा सुटकेस र सिरक घोषणा गरेर करिब ८ लाख भन्सार तिरेका थिए ।

गएको मंसिर २ गते दिउँसो जाँच सकिएको ना ३ ख ७०१ नम्बरको कन्टेनर साँझ करिब ६.३० मा भन्सारहाताबाट बाहिरिएको थियो । राजस्वले कन्टेनर भन्सारबाट छुटेको २ दिनपछि मंसिर ४ गते बाटोबाट बरामद गरेको थियो ।

वा ६ ख १००० नम्बरको कन्टेनरमा ताला लगाएर राखेको अवस्थामा बुद्ध इन्टरप्राइजेजले घोषणा गरेकै मालवस्तुमा मेल खाने सुटकेस र सिरक भेटिएको थियो । लामाले उक्त कन्टेनर आफ्नो बताएकाले चेक गरिएको थियो ।

घोषणा गरेको मालबस्तुको खोजी गर्दा कन्टेनरमा लोड गरेको अवस्थामा छरपष्ट रूपमा राखिएको केही सुटकेस र सिरक भेटिएको दाबी भन्सारका कर्मचारीले गर्दैआएका छन् ।