बेइजिङमा योगेश भट्टराईको सम्बोधन : ‘बीआरआईबाट ठोस लाभ प्राप्त गर्नेमा हामी आशावादी छौं’

काठमाडौं । नेकपा (एमाले)का सचिव तथा प्रतिनिधिसभा सदस्य योगेश भट्टराईले जनताको बहुदलीय जनवाद(जबज) को मार्गदर्शनमा नेपाल शान्तिपूर्ण बाटोमार्फत् समाजवादतर्फ अघि बढिरहेको बताएका छन् । सचिव भट्टराईले आफूहरुले शान्तिपूर्ण प्रक्रियामार्फत् नेपाली जनताको बलियो समर्थनसहित समाजवाद हासिल गर्न चाहेको तर नेपाल त्यसैतर्फ अघि बढेको बताएका हुन् ।

‘सोसियल साइन्स एकेडेमी’ अर्थात् चिनियाँ सामाजिक विज्ञान प्रतिष्ठानको आयोजनामा बेइजिङमा आयोजित १४औं विश्व समाजवाद फोरमलाई सम्बोधन गर्दै एमाले सचिव भट्टराईले जबज नेपाली भूमिमा माक्र्सवादको सृजनात्मक प्रयोग रहेको र त्यसैको आलोकमा समाजवाद हासिल गर्न चाहेको बताए ।

‘नेपालमा हामी समाजवादीउन्मुख संविधान स्वीकार गर्दै सामाजिक–आर्थिक असमानतालाई सम्बोधन गर्न अघि बढिरहेका छौं, जसमा प्रमुख राजनीतिक दलहरूको सामूहिक विवेक समावेश छ । हाम्रो पार्टी नेकपा (एमाले) ले स्वर्गीय ह मदन भण्डारीको नेतृत्वमा ‘जनताको बहुदलीय जनवाद(जबज)को सिद्धान्त विकास गरेको छ,’ सचिव भट्टराईले सम्बोधनमाभनेका छन्, ‘हामी जबजको मार्गदर्शनमा नेपाली तरिकामा शान्तिपूर्ण माध्यमबाट समाजवादतर्फ अघि बढिरहेका छौं । जबज नेपाली अभ्यास र नेपाली भूमिमा माक्र्सवादको रचनात्मक प्रयोगमा आधारित छ । हामी शान्तिपूर्ण प्रक्रियामा जनताको बलियो समर्थनसहित समाजवाद हासिल गर्न चाहन्छौं । यो नयाँ युगको नेपाली मोडेल र विशेषताहरूको क्रान्ति हो ।’

बेइजिङमा जारी १४ औं विश्व समाजवाद फोरममा विश्वका ३० देशका कम्युनिष्ट नेता, माक्र्सवादी बुद्धिजीवी, विश्वविद्यालयका प्राध्यापक, अनुसन्धानकर्ता गरी ५० विदेशी अतिथि र चिनियाँ नेता, प्राध्यापकसहित १ सय ५० बढी सहभागी छन् ।

फोरमलाई सम्बोधन गर्दै नेपालको मुख्य ध्येय नेपालको सार्वभौमसत्ता, भौगोलिक अखण्डता, स्वतन्त्रता रक्षा गर्दैै भट्टराईले राष्ट्रिय गरिमालाई उन्नत गर्नु र आर्थिक समृद्धि तथा समृद्धि प्रवद्र्धन गर्नु रहेको बताए । यी उद्देश्यहरू हासिल गर्न, हामी एकअर्काको समानताप्रतिको सम्मान, पारस्परिक फाइदाका लागि सहयोग, गुटनिरपेक्षता, संयुक्त राष्ट्रसंघको चार्टर र विश्वशान्तिका मूल्यहरु नेपालले दृढतापूर्वक पालना गर्ने बताए ।

उनले भने, ‘प्रधानमन्त्री केपी शर्मा ओलीको नेतृत्वमा ‘समृद्ध नेपाल, सुखी नेपाली’ भन्ने राष्ट्रिय आकांक्षालाई पूरा गर्ने हाम्रो महान् चाहनाका साथ हामी सबै मित्रहरूको समर्थन, सहयोग र ऐक्यबद्धताको अपेक्षा राख्छौं ।’

‘समाजवादी देशहरूबीच सहयोग अपरिहार्य’

सचिव भट्टराईले मानव सभ्यता र पृथ्वीलाई जोगाउन समाजवादी देशहरूबीच सहयोग अपरिहार्य रहेको बताए । उनले भने, ‘समाजवादी देशहरू थोरै छन्, ती सबै वित्तीय रूपमा पूर्ण वा विकासोन्मुख छैनन् । यस्तो अवस्थामा सहयोग लाभदायक हुन्छ । पुनः समाजवादको मुख्य उद्देश्य सबैको साझा विकास हो । एक्लै हामी कतै पुग्दैनौं । त्यसैले, सहयोग अपरिहार्य छ । हामीले मानव सभ्यता र पृथ्वीलाई जोगाउन समाजवादका लागि हाम्रो ऐक्यबद्धता र सहयोगलाई सुदृढ पार्नुपर्नेछ ।’

सचिव भट्टराईले अतीतमा समाजवादको आलोचना हुँदा मानवपक्षलाई ध्यान दिएको थिएन भन्ने आरोपबारेमा सम्झाउँदै समाजवादको कुनै विकल्प नरहेको बताए । उनले भने,‘समाजवादका आलोचकहरूले समाजवादले मानिसहरूलाई वस्तुका रूपमा वर्गीकृत गर्यो र समाजलाई गणितीय रूपमा विश्लेषण गर्यो भनेका थिए त्यसैले माक्र्सवादलाई मानव सारतत्वप्रति विशेष ध्यान दिन आवश्यक छ । समाजवादले मानव सभ्यताको सवाललाई बेवास्ता गर्न सक्दैन । शोषण र दमनविरुद्धको लडाइँको कुरा भइरहेको छ, साथै मानवपक्ष र मानव सभ्यताको सवाल प िन। यही कुरा समाजवादलाई सुधार गर्न आवश्यक छ । समाजवादको कुनै विकल्प छैन ।’

सचिव भट्टराईले जलवायु परिवर्तनको प्रभाव विश्वको प्रमुख चुनौती रहेको भन्दै जलवायु परिवर्तनविरुद्धको विश्वव्यापी लडाइँ न्यायसंगत हुनुपर्ने बताए । उनले भने,‘आज हामीले सामनागरिरहेको प्रमुख चुनौती जलवायु परिवर्तनको प्रभाव हो । हिन्दकुश हिमालय क्षेत्रमा अवस्थित देशको रूपमा, नेपाल विश्वव्यापीतापनको प्रभावका कारण अत्यधिक संवेदनशील छ। हिमनदीहरूको पग्लने, समुद्री सतहको बृद्धि, प्राकृतिक प्रकोपहरूको बृद्धि, बाढी, पहिरोहरूले हिमालयन विविधता, पृथ्वी र मानवतामा खतरा ल्याइरहेको छ । करिब ४४ प्रतिशतवन क्षेत्रले ढाकिएको हरियो क्षेत्रको रूपमा चिनिने नेपालको आश्चर्यजनक प्राकृतिक सौन्दर्यलाई विश्वले चिन्छ । हामी विश्वास गर्छौं कि जलवायु परिवर्तनविरुद्धको विश्वव्यापी लडाइँ न्यायसंगत हुनुपर्छ र गरिब तथा सीमान्तकृत मानिसहरूको बाँच्न पाउने अधिकार सुनिश्चित गरिनुपर्छ ।’

‘चीनबाट धेरै कुरा सिक्न चाहन्छौं’

सचिव भट्टराईले चिनियाँ समाजवादको मोडेल सफल रहेको भन्दै चीनबाट अझ धेरै कुरा सिक्न चाहेको बताए । भने, ‘चिनियाँ समाजवादको मोडेल सफल छ । हामी चीनबाट अझ धेरै कुरा सिक्न चाहन्छौ ं। म तपाईं चिनियाँ कमरेडहरूलाई चिनियाँ कम्युनिस्ट पार्टी र राष्ट्रपति सी जिनपिङको नेतृत्वमा हासिल गरेको ठूला सफलताहरूको लागि धन्यवाद दिन चाहन्छु ।’

उनले विश्व राजनीति ठूलो परिवर्तनको दौरबाट गुज्रिरहेको छ, र नेपालका अन्तर्राष्ट्रिय सम्बन्धहरू पनि त्यही अनुसार परिवर्तन भइरहेको बताए । उनले भने, ‘नेपाल भू–राजनीतिक रूपमा संसारका पहिलो र दोस्रो जनसंख्या भएका देशहरू—चीन र भारतको बीचमा रहेको छ । चीन तीव्र रूपमा समृद्धितर्फ अघि बढिरहेको छ । हामी यो अवसरलाई नेपाली जनताको समृद्धि र खुशीका लागि काम गर्न उपयोग गर्न चाहन्छौं ।’

सचिव भट्टराईले नेपालले २०१७ मा समृद्धि र विकासको अपेक्षासहित बीआरआईमा हस्ताक्षर गरेको उल्लेख गर्दै बीआरआईबाट ठोस लाभ प्राप्त गर्नेमा आशावादी रहेको बताए । भने, ‘पुनः एकपटक, म हाम्रो देश र पार्टीको दीर्घकालीन एक चीन सिद्धान्तप्रतिको प्रतिबद्धता व्यक्तगर्न चाहन्छु । नेपालले २०१७ मा समृद्धि र विकासको अपेक्षासहित बीआरआईमा हस्ताक्षर गरेको थियो । हामी आशावादी छौं कि आगामी दिनहरूमा बीआरआईबाट ठोस लाभ प्राप्त गर्नेछौं ।’

उनले नेपालका तत्कालीन राष्ट्रपति विद्यादेवी भण्डारी र चीनका राष्ट्रपति सी जिनपिङका साथै नेपालका प्रधानमन्त्री र चीनका उच्चस्तरीय नेताहरूको द्विपक्षीय भ्रमणको सम्झना गरे । उनले भने, ‘यसै क्षणमा, म नेपालका तत्कालीन राष्ट्रपति श्रीमती विद्यादेवी भण्डारी र चीनका राष्ट्रपति सी जिनपिङका साथै नेपालका प्रधानमन्त्री र चीनका उच्चस्तरीय नेताहरूको द्विपक्षीय भ्रमणलाई सम्झना गर्न चाहन्छु ।’