संचारगृहमाथिको अवरोधले बोल्ने, लेख्ने र प्रश्न गर्नेहरू चुप लाग्ने छैनन् : योगेश भट्टराई

काठमाडौं । मिडिया हाउसहरुको गेटमा गाडी तेस्र्याउने कार्यको सर्बत्र निन्दा र भत्सर्ना भएको छ । सोमबार बिहान कान्तिपुर मिडिया ग्रुप, अनलाइन खबर, हिमालय टीभी लगायतका मिडियाका कार्यालयको गेटमा गाडी पार्किङ गरी कार्यालयभित्रबाट सवारीसाधन आवतजावतमा अवरोध गरिएको थियो ।

मिडियाका अफिसमा मात्र होइन, नेपाली कांग्रेसका सभापति गगनकुमार थापाको निवासको गेटमा समेत गाडी राखिएको थियो । यी गाडी पार्किङ गरी मिडियामाथि त्रास सृजना गर्न खोजिएकोमा राजनीतिक दलका नेतादेखि सबैले बिरोध गरेका छन् ।

नेकपा(एमाले)का उपमहासचिव योगेश भट्टराईले संचारगृहमा गरिएको अवरोध अनि संचारकर्मीमाथिको मानसिक त्रासले बोल्ने, लेख्ने र प्रश्न गर्नेहरू चुप नलाग्ने बताएका छन् । सामाजिक संजाल फेसबुकमा उनले लेखेका छन्–‘संचारगृहमा गरिएको अवरोध अनि संचारकर्मीमाथिको मानसिक त्रासले बोल्ने, लेख्ने र प्रश्न गर्नेहरू चुप लाग्ने छैनन् । आजको घटना राज्यको मण्डलेकरणको भद्दा अनुकरण मात्र हो । टिक्ने छैन ।’