योगेश भट्टराईसहितका नेताहरूबिरुद्ध घृणा फैलाउन फेक आईडी प्रयोग, एमालेका माथिल्लै नेता संलग्न

काठमाडौं । नेकपा(एमाले)ले चुनावमा अनपेक्षित पराजय भोगेपछि नेतृत्व परिवर्तनको पक्षमा तलदेखि माथिसम्म आवाज बुलन्द हुन थालेको छ । नेतृत्व परिवर्तनको पक्षमा आवाज उठाउनेहरुलाई एमाले अध्यक्ष केपी शर्मा ओलीनिकटकै नेताहरु फेक आइडी प्रयोग गरी घृणा फैलाउन लागेका छन् ।

पार्टीमा नेतृत्व परिवर्तनको पक्षमा आवाज उठाउने नेताहरु सुरेन्द्र पाण्डे, योगेश भट्टराई, गोकुल बाँस्कोटालगायतका नेताहरुबिरुद्ध सरु शर्मा नामक फेक फेसबुक आईडीबाट घृणा र गालीगलौज गर्न सुरु गरिएको छ ।  उक्त फेसबकु आईडीबाट पाण्डे, भट्टराईसहितका नेताहरुको बिरुद्ध सामाग्री पोष्ट गर्ने क्रम केही दिनयतादेखि भइरहेको छ । जसको खुलासा आज पार्टीका उपमहासचिव योगेश भट्टराईले गरेका छन् ।

एमालेका अध्यक्ष केपी ओलीका पिताको निधन भएको र शोकको घडी भएकाले यस्तो बेलामा एकअर्काप्रति नकारात्मक टिप्पणी र घृणाजन्य अभिब्यक्ति अशोभनीय हुन्छ भन्दै भट्टराईले सामाजिक संजालमा लेखेका छन् । उनले पार्टीका माथिल्ला तहका नेताहरुबाट मलगायत अन्य नेताहरुको बारेमा अनर्गल लान्छना लगाउने, घृणायुक्त अभिब्यक्ति दिने, मिथ्या सूचना सम्प्रेषण गर्ने काम भइरहेको उल्लेख गरेका छन् ।

भट्टराईले लेखेका छन्–हाम्रो पार्टी नेकपा एमालेका अध्यक्ष आदरणीय केपी शर्मा ओली पितृ शोकमा रहनु भएको छ । सोही कारण पार्टी सचिवालय बैठकको अध्यक्षता आफूले गर्नुभएन । उपाध्यक्ष रामबहादुर थापाको अध्यक्षतामा बैठक भएको सबैमा जानकारी नै छ । यो समय हामी सबैका लागि पनि शोकको घडी हो । यस्तो बेलामा एक अर्काप्रति नकारात्मक टिप्पणी र घृणाजन्य अभिव्यक्ति अशोभनीय हुन्छ ।

यसबीचमा पार्टीका मथिल्लो तहका नेताहरूबाट म लगायत अन्य कमरेडहरूका बारेमा अनर्गल लान्छना लगाउने, घृणायुक्त अभिव्यक्ति दिने तथा मिथ्या सूचना सम्प्रेषण गर्ने काम भइरहेको छ । शरू शर्मा नामको नक्कली फेसबुक आईडी यो काममा निक्कै सक्रिय छ ।

पार्टीको एकता जोगाउनु, पार्टीलाई बहुआयामिक रूपले रूपान्तरण गर्नु, गुमेको जनविश्वासलाई पुनः आर्जन गर्नु हामी सबै नेकपा एमालेहरूका लागि प्राथमिक महत्वको कार्यभार हो । यसका लागि उपयुक्त समयमा उपयुक्त बिधी र स्थापित प्रक्रिया मार्फ़त तथ्य र तर्क सहित छलफल र बहस गर्न जरूरी छ ।

Misinformation, Disinformation / Hait speech बन्द गरौ । फेरि पनि भन्छु आत्मभत्सर्ना होइन जमेर आत्मसमीक्षा गरौ ।