योगेशले मागे सबैसँग सुझाव, एमाले चुनावमा कसरी हार्‍यो ?

काठमाडौं । नेकपा (एमाले)का उपमहासचिव योगेश भट्टराईले देशविदेशमा रहेका एमालेजन, बुद्धिजीवीदेखि सबैलाई भर्खरै सम्पन्न निर्वाचनमा कमजोर परिणाम आउनुका कुन कुन कारण हुनसक्छन्, त्यसको बारेमा सुझाव तथा टिप्पणी पठाउन अनुरोध गरेका छन् ।

सामाजिक संजालमा उनले देश तथा प्रवासमा रहेका नेकपा एमालेका शुभेच्छुक, बुद्धिजीवी तथा आम नेपाली दाजुभाइ तथा दिदीबहिनीहरूलाई सम्बोधन गर्दै त्यस्तो सुझाव पठाउन आग्रह गरेका छन् ।

एमाले किन हार्यो ? नीति, नेतृत्व, संगठन, व्यवहार, कार्यशैली, व्यवस्थापन, एजेन्डा, प्रचार आदि आन्तरिक र बाह्य कारणहरू के के हुन् उल्लेख गरी पठाउन आग्रह गरेका छन् । उनले त्यस्ता सुझाव इमेल र ह्वाट्सएपमा पठाउन अनुरोध गरेका छन् ।

भट्टराईलेले सामाजिक संजालमार्फत् सुझाव माग्दै लेखेका छन्–२०८२ फागुन २१ गते सम्पन्न प्रतिनिधिसभा सदस्य निर्वाचनको सम्पूर्ण नतिजा आइसकेको छ । निर्वाचनको परिणामले एमालेलाई ठूलो धक्का लागेको छ । नेकपा एमाले जस्तो लोकप्रिय, बलियो जनआधार र सुदृढ संगठन भएको पार्टी किन यस्तो अवस्थामा पुग्यो ? यसको वस्तुनिष्ठ समीक्षा हुनुपर्दछ । समीक्षा आग्रहभन्दा माथि उठेर गरिनुपर्दछ ।

फेरि पनि एमालेको एकता, रूपान्तरण, पुनर्गठन र पुनर्जागरणका लागि नयाँ संकल्पका साथ अघि बढ्नुपर्दछ । समीक्षामार्फत् जिम्मेवारी किटान गर्नुका साथै जवाफदेहिताको प्रश्न समाधान हुनेछ । यसका लागि निम्न विषयमा राय, सुझाव तथा टिप्पणी पठाउन अनुरोध गर्दछु ।

१. निर्वाचनमा एमालेको कमजोर परिणाम आउनुमा कुन–कुन कारणहरू होलान् ? किन ? (नीति, नेतृत्व, संगठन, व्यवहार, कार्यशैली, व्यवस्थापन, एजेन्डा, प्रचार आदि) आन्तरिक र बाह्य कारणहरू उल्लेख गर्नुहोस् ?

२. एमालेको रूपान्तरणका लागि कुन–कुन पक्षमा के–के सुधार गर्नुपर्ला ? सुधारका प्रस्तावहरूसहित रूपान्तरणको विधि र प्रक्रियाबारे सुझाव दिनुहोस् ।

३. एमालेका सबल र कमजोर पक्षहरू तथा यसको सम्भावना के–कस्तो देख्नुहुन्छ ?