एमाले नेता योगेश भट्टराईको माग : ओलीलाई अबिलम्ब रिहा गरियोस्

काठमाडौं । नेकपा (एमाले)का उपमहासचिव योगेश भट्टराईले लोकतान्त्रिक ब्यवस्थामा राज्य र सरकार आक्रमक होइन संयम हुनुपर्ने बताएका छन् । उनले प्रतिशोध र बदला होइन, संवाद र सहकार्यको बाटोमा जानुपर्दछ भन्ने कुरामा जोड दिएका छन् ।

भट्टराईले कानुनी राज्य र बिधिको शासनको उपहास गर्दै गिरफ्तार गरिएका एमालेका अध्यक्ष तथा पूर्वप्रधानमन्त्री केपी शर्मा ओलीको तत्काल रिहाइको माग गरेका छन् । उनले घटनाको न्यायिक, निष्पक्ष र पारदर्शी छानबिन हुनुपर्ने बताएका छन् ।

सामाजिक संजालमा भट्टराईले लेख्छन्–लोकतान्त्रिक ब्यवस्थामा राज्य र सरकार आक्रमक होइन संयम हुनुपर्दछ । प्रतिशोध र बदला होइन, संवाद र सहकार्यको बाटोमा जानु पर्दछ ।

कानूनी राज्य र बिधिको शासनको उपहास मान्य छैन ।

घटनाको न्यायीक, निष्पक्ष र पारदर्शी छानबिन हुनुपर्दछ ।

हाम्रो पार्टी नेकपा एमालेका अध्यक्ष कमरेड केपी शर्मा ओली र नेपाली कांग्रेसका नेता रमेश लेखकको गिरफ्तारीको निन्दा गर्दछु । अविलम्ब रिहाईको माग गर्दछु ।
जनताबाट प्राप्त जनादेशको दुरुपयोग नहोस्, सरकारको ध्यानाकर्षण गर्दछु ।

हाम्रो पार्टीले कानूनी र राजनीतिक बाटो लिनुपर्दछ । संयम र धैर्यताकासाथ एकताबद्ध भएर प्रतिकूल परिस्थितिको सामना गरिनेछ ।