विमानस्थलबाट सूर्ती र गुट्खा तस्करी, डीआईजीकै घुमुवाको सेटिङ

काठमाडौं । त्रिभुवन अन्तर्राष्ट्रिय विमानस्थल कार्यालय भिजिट भिसाका कारण बदनाम छ । प्रहरीले हिस्सा नपाएपछि केही महिनाअघि अध्यागमन एयरपोर्टका कर्मचारीसँग विवाद सृजना भई कुटाकुट समेत भएको थियो ।

तत्कालीन डीआईजी अर्जुन चन्द ठकुरीले भिजिट भिसामा हिस्सा नपाएकै कारण अध्यागमन कर्मचारीहरुलाई प्रहरीले कुटपिट गरेको बिषय सार्वजनिक हुन पुगेको थियो । भिजिट भिसा सेटिङमा मानव बेचबिखन अनुसन्धान ब्यूरोका तत्कालीन एसएसपी जीवनकुमार श्रेष्ठले सई दिब्य मोक्तानमार्फत् सेटिङ गर्दैआएका थिए । मानव बेचबिखन ब्यूरो भिजिट भिसा सेटिङमा बदनाम भएको कुरा आईजीपी बसन्तबहादुर कुँवरसम्मै पुगेपछि उनले एसएसपी श्रेष्ठलाई घुस्याहाकै संज्ञा दिएका थिए ।

त्रिभुवन अन्तर्राष्ट्रिय विमानस्थलबाट हुने सुन तस्करीमा भन्सार र नागरिक उड्डयनका कर्मचारीजस्तै प्रहरी पनि उत्तिकै जिम्मेवार रहेको बिषयमा भने ध्यान पुग्न सकेको छैन । त्रिभुवन अन्तर्राष्ट्रिय विमानस्थलमा दसौं बर्षदेखि कार्यरत प्रहरी छन् । ती जुनियर प्रहरी अधिकृतहरु १० वर्षदेखि काजमा खटाएर हाकिमहरुले आफ्नो दुनो सोझ्याउने काम गर्दै आएको आरोप छ ।

हालका त्रिभुवन अन्तर्राष्ट्रिय विमानस्थल कार्यालयका डीआईजी कृष्णहरि शर्मा पोखरेलले पनि पैसा उठाउन असई विनयकुमार सिंहलाई घुमुवा राखेका छन् । त्रिभुवन बिमानस्थलबाट खाडी मुलुकमा व्यापक सूर्ती र गुट्खा अवैध रुपमा लाने गिरोह नै छ । त्यसरी सूर्ती गुट्खा तस्करी गराउने कार्यमा एयरपोर्ट नजिकका होटेल ब्यवसायी, कार्गो कुरियर र ट्याक्सीवालाहरुलाई असई सिंहले पैसा–रक्सी मागेको व्यापक जनगुनासोपछि उपत्यका प्रहरी कार्यालयले ललितपुर परिसर काज सरुवा गरेको छ । तर पछिल्लो समय उपत्यका प्रहरीले रमाना गर्न ताकेता गरेपछि डीआईजी पोखरेलले रेकर्ड नजनाई १० दिन ठाडो आदेशमा बिदा छोडेका छन् ।

अहिले आफ्नो बढुवा भएपछि बिदाबाट बोलाएर असई सिंहलाई फेरि उठौतीपुठौती धन्दामा लगाएका छन् । असई बिनयकुमार सिंहको दरबन्दी इलाका प्रहरी कार्यालय चन्द्रनिगाहपुर रौतहटमा हो । उनी जिल्ला प्रहरी कार्यालय काजमा खटिएका छन् । तर रमाना नबुझी डीआईजी पोखरेलको आशीर्वादमा विमानस्थलमा कार्यरत छन् ।

यस अगाडि वरिष्ठ हवल्दार हुँदा तराईमा पनि घुमुवा थिए उनी । तत्कालीन डीआईजी तथा हाल आईजीपी बसन्तबहादुर कुँवरले उनलाई काठमाडौंको दरबन्दीमा रमाना गरेका थिए । अहिले असई बढुवा भएपछि रौतहटमा दरबन्दी छ । तर दरबन्दी चन्द्रनिगाहापुर भएपनि काठमाडौं एयरपोर्टमा असुलीमा खटिएका छन् । उनका बारेमा धेरै गुनासा आएपछि उपत्यका प्रहरी कार्यालय रानीपोखरीका एआईजी दीपक थापाले ललितपुर परिसर काज गरेको तर डीआईजी पोखरेलले रमाना गर्न अटेर गर्दैआएका छन् ।

सोहीकारण उपत्यका प्रहरी कार्यालय र एयरपोर्टका डीआईजीबीच नै मनमुटाव हुन पुगेको छ । डीआईजी शर्मा बढुवापछि पनि एयरपोर्टमै बसेर असई सिंहलाई प्रयोग गरेर पैसा उठाउन खोजेको आरोप छ । एयरपोर्टबाट खाडीमा व्यापक सूर्तीजन्य सामाग्री ब्यापक तस्करी भइरहेको छ । गृहमन्त्री रवि लामिछानेले घुमुवा हटाउने भने पनि त्यो पालना गरेको छैन । डीआईजी शर्माले खुलेआम सूर्ती र गुट्खा तस्करी गरेर पैसा उठाउँदा कारबाही गर्नुको साटो संरक्षण गर्दा लामिछानेको निर्देशन ब्यवहारमा लागू हुन नसकेको देखिन्छ ।