नेपालफेस समाचार प्रभावः एयरपोर्टमा लामो समय कार्यरत ५४ प्रहरीको सरुवा

काठमाडौँ । नेपाल प्रहरीले त्रिभुवन अन्तर्राष्ट्रिय विमानस्थलमा लामो समयदेखि कार्यरत ५४ प्रहरी कर्मचारीलाई सरुवा गरेको छ ।

विमानस्थलमा केही जुनियर अधिकृत लामो समयदेखि काजमा कार्यरत रहेको र उनीहरुकै कारण सुन तस्करीदेखि बिभिन्न काण्ड घट्ने गरेको समाचार नेपालफेस डटकमले बुधबार बिहान उजागर गरेको थियो ।

नेपालफेसले १० बर्षदेखि काजमा कार्यरत केही प्रहरीको नामसमेत उल्लेख गरी समाचार प्रकाशित गरेपछि नेपाल उपत्यका प्रहरी कार्यालय, रानीपोखरीले उनीहरुलाई बुधबार दिउँसो एकसाथ हटाउने निर्णय गरेको छ ।

५ वर्षदेखि १६ वर्षसम्म विमानस्थलमै बसेका प्रहरी कर्मचारीलाई त्यहाँबाट अन्यत्र सरुवा गरिएको उपत्यका प्रहरी कार्यालयले जनाएको छ । लामो समयदेखि कार्यरत प्रहरीलाई हटाएर उनीहरुको ठाउँमा नयाँ टिम परिचालन गरिएको उपत्यका प्रहरी कार्यालयले जनाएको छ ।