स्थापित र यादवलाई एमाले पार्टीबाट हटायो, मणिलाई स्पष्टीकरण !

काठमाडौँ। प्रमुख प्रतिपक्षी नेकपा एमालेले पूर्वमन्त्री र प्रदेश सभा सदस्य समेत रहेका केशव स्थापित र केन्द्रीय सदस्य प्रमोदनारायण यादव (सिराहा)लाई पार्टीबाट बिदा गरेको छ । त्यस्तै एमालेले अर्का एक जना स्थायी कमिटी सदस्यलाई केही दिनमै हटाउने तयारी समेत गरेको छ ।

हिजो सोमबार बसेको नेकपा एमाले केन्द्रीय सचिवालय बैठकले यी दुई जना नेतालाई पार्टीबाट हटाएको हो ।

स्थापित २०७९ को निर्वाचनमा एमालेका तर्फबाट काठमाडौँ महानगरपालिकाको मेयर पदमा उम्मेदवार बनेका थिए । स्थापित र यादवले पार्टीमा सक्रिय हुन नसक्ने मौखिक जानकारी दिएपछि उनीहरूलाई पार्टीले बिदा गरेको उपाध्यक्ष सुवास नेम्वाङले बताए । पार्टीमा रहेर पनि सक्रिय नहुने नेताहरूलाई क्रमशः हटाउँदै जाने नीति अनुसार दुई जना नेतालाई सोमबारको सचिवालय बैठकले निर्णय गरेर हटाएको हो ।

त्यस्तै पूर्वमन्त्री समेत रहेका माओवादी पृष्ठभूमिका स्थायी कमिटी सदस्य मणि थापालाई स्पष्टीकरण सोध्ने निर्णय गरेको एमालेका एक नेताले जानकारी दिए । ‘लामो समयदेखि पार्टी कमिटीमा रहेर पनि कुनै पनि काममा नलाग्नेहरुलाई छाँट्दै जाने नीति पार्टीको छ । सोही अनुसार सक्रिय हुन नसक्नेहरूलाई बिदा दिने निर्णय भएको हो’, एमालेका एक पदाधिकारीको भनाइ छ ।

ती पदाधिकारीका अनुसार स्थायी कमिटी सदस्य थापाको हकमा एकपटक स्पष्टीकरण सोधेपछि निर्णयमा पुग्ने निर्णय सचिवालयले गरेको छ ।