सुन तस्करीको निशाना माओवादी नेतातिरै सोझियो, गृहमन्त्री श्रेष्ठले बर्षमान र महरालाई कारबाही गर्लान् ?

काठमाडौं । साउन २ गते त्रिभुवन अन्तर्राष्ट्रिय विमानस्थल भन्सार कार्यालयबाट पार भइसकेको मोटरसाइकलको ब्रेक सूको नाममा हङकङबाट भित्रिएको १ क्वीन्टल सुन सिनामंगलमा राजस्व अनुसन्धान विभागको टोलीले बरामद गरेपछि एकपछि अर्को त्यसका रहस्यका पर्दाहरु खुलिरहेका छन् ।

यसअघि २२ पटक हङकङबाट फरक फरक एयरलाइन्सका विमान प्रयोग गरी ब्रेक सू त्रिभुवन विमानस्थलबाट आयात गरिएको थियो । हङकङबाट यसअघि कहिल्यै ब्रेक सू नभित्रिएकाले भन्सार कार्यालयदेखि नागरिक उड्डयन प्राधिकरण र नेपाल प्रहरीको सेटिङमा २२ पटक नै सुन भित्रिएको सहजै अनुमान गर्न थालिएको छ । नेपालमा ब्रेक सू भित्र राखेर सुन तस्करी गर्ने राकेश अडुकिया भएको उनको ट्राभल हिष्ट्रीले पनि पुष्टि गरेको छ । अझ नेपालमा बैंक, वित्तीय संस्थाको संचालक रहेका र अरबौका सेयर कारोबार गर्ने अडुकियाले भारतीय राहदानी प्रयोग गरेको खुलेको छ । अडुकिया पूर्वअर्थमन्त्री जनार्दन शर्माका निकट ब्यापारीका रुपमा चिनिन्छन् ।

विमानस्थल भन्सारका प्रमुख अरुण पोखरेल पनि जनार्दन शर्माकै निकट मानिन्छन् । शर्माले नै पोखरेललाई बीरगंजको भन्सार प्रमुखमा सरुवा गरेका थिए । बीरगंजबाट विमानस्थल भन्सारमा पनि शर्माले नै ल्याएका थिए । पोखरेल ब्रेक सुको नाममा सुन भित्र्याउँदा नाटकीय ढंगले बिदामा बसेका थिए । तर अडुकियासँग सुनको सेटिङ भइसकेपछि उनी बिदा बसेको आरोप छ । पोखरेल बीरगंजमा हुँदा पनि तस्करीको लाइन दिएर बिदामा बस्ने गरेको उनलाई नजिकबाट चिन्नेहरु बताउँछन् ।

सुन तस्करीमा अडुकियादेखि दावासम्म

क्वीन्टलका क्वीन्टल सुन तस्करी प्रकरणको लहरो तन्किरहेको छ । सुन तस्करीको लहरोमा माओवादीका एकपछि अर्को नेता तानिंदैछन् । इलेक्ट्रिक चुरोट (भेप)मा सुन तस्करी गर्ने चिनियाँ नागरिक डाजिङ वाङसँग माओवादी नेता कृष्णबहादुर महरा र उनका छोरा राहुल महराको नाम मुछिएको थियो ।

साउन २ गते बरामद भएको सुनको लहरो अर्का माओवादी नेता बर्षमान पुनसँग जोडिन पुगेको छ । राजस्व अनुसन्धान विभागले काठमाडौंको ठमेलबाट साउन १४ मा चिनियाँ मूलका बेल्जियमका नागरिक दावा छिरिङलाई पक्राउ गरेसँगै सुन तस्करीको कनेक्सन माओवादी नेता बर्षमान पुनसँग जोडिन पुगेको हो ।

१ क्वीन्टल सुन राजस्वले बरामद गरेपछि गृहमन्त्री श्रेष्ठले तस्करीमा संलग्न जोकोहीलाई नछोड्ने चर्का भाषण गरिरहेका छन् । तर सुन तस्करी प्रकरणमा जोडिएका माओवादीका नेताद्वय बर्षमान पुन र कृष्णबहादुर महरालाई कारबाही गर्लान् ?