एमालेको ११ औं महाधिवेशन : मतगणना सुरु गर्ने तयारी, तीन घण्टाभित्र नतिजा आउने

काठमाडौं । नेकपा (एमाले) को ११ औँ राष्ट्रिय महाधिवेशनको मतदात प्रक्रिया सकिएको छ । नयाँ नेतृत्व चयनका लागि सम्पन्न भएको मतदानको मतगणना आज बिहान ८ः०० बजेदेखि सुरु गर्ने तयारी गरिएको छ ।

महाधिवेशनस्थल भृकुटीमण्डपमा सम्पन्न मतदानमा दुई हजार दुई सय २७ मत खसेको छ ।

केन्द्रीय निर्वाचन आयोगका उपाध्यक्ष सानुराज पोखरेलका अनुसार कुल २ हजार २ सय ६३ महाधिवेशन प्रतिनिधि मतदाता रहेकामा ३६ जना विभिन्न कारणले मतदानमा अनुपस्थित भएका थिए । मतदान प्रक्रिया बुधबार बिहान ९ः१२ बजेदेखि सुरु भएको थियो ।

पोखरेलका अनुसार मतगणना सुरु गर्नुअघि मुचुल्का उठाउने र दलहरूबीच सहमति कायम गर्ने प्रक्रियाका कारण केही समय लाग्नेछ । तर मतगणना सुरु भएको करिब तीन घण्टाभित्र प्रारम्भिक परिणाम सार्वजनिक हुने अपेक्षा गरिएको छ ।

एमालेको ३०१ सदस्यीय केन्द्रीय कमिटी चयनका लागि यसपटक करिब ६ सय ४२ जना उम्मेदवार चुनावी प्रतिस्पर्धामा छन्। मतदान प्रक्रियालाई छरितो बनाउन ८० वटा विद्युतीय भोटिङ मेसिन प्रयोग गरिएको थियो ।