सन्तोष चालिसेबिरुद्ध भ्रष्टाचार मुद्दा दर्ता, कुलमानलाई काठमाडौं ३ मा सहज

काठमाडौैं । अख्तियार दुरुपयोग अनुसन्धान आयोगले नेपाली कांग्रेसका पूर्वसांसद तथा गोकर्णेश्वर नगरपालिकाका तत्कालीन मेयर सन्तोष चालिसेका बिरुद्ध आइतबार बिशेष अदालतमा भ्रष्टाचार मुद्दा दायर गरेको छ ।

गोकर्णेश्वर नगरपालिकको ५ बर्ष नगरप्रमुख हुँदा चालिसेको आयब्यय सबै हिसाब गर्दा ३ करोड ६८ लाख ४७ हजार ७ सय ६१ रूपैयाँ एकहत्तर पैसाको स्रोत पुष्टि हुन नसकेकाले उनले भ्रष्टाचार गरी गैरकानुनी सम्पत्ति आर्जन गरेको जिकिरसहित अख्तियारले उल्लेखित रकम बराबर बिगो कायम गरी मुद्दा दायर गरेको जनाएको छ ।

काठमाडौं क्षेत्र नं. ३ का सांसदसमेत रहेका चालिसेलाई मुद्दा दायर गरेपछि त्यस क्षेत्रबाट चुनाव लड्ने घोषणा गरेका उर्जासहित तीन वटा मन्त्रालयका मन्त्री कुलमान घिसिङलाई थप सहज भएको छ । गोकर्णेश्वर नगरपालिकाको मेयर हुँदा विकासका कामबाट त्यस क्षेत्रमा लोकप्रिय रहेका चालिसेलाई मुद्दा दायर गरेपछि कुलमानलाई चुनावमा थप सहज हुने भएको छ । कुलमानलाई सहज बनाउनका लागि चालिसेबिरुद्ध मुद्दा दायर गरिएको भन्ने चर्चा समेत हुने गरेको छ ।

चालिसे आफूबिरुद्ध मुद्दा दायर नै हुन्छ भन्ने कुरामा विश्वस्त थिएनन् । सामान्य छानबिनका रुपमा उनले बुझेका थिए । चालिसे संसदको अर्थसमितिका सभापति समेत थिए । उनी अर्थ समितिको सभापति हुँदा नयाँ स्टक एक्सचेन्जको अनुमति रोक्नका लागि उजुरी परेको थियो ।

अर्थसमितिले स्टक एक्सचेन्जको लाइसेन्स रोक्न निर्देशन पनि दियो । तर एक बर्षभन्दा बढी समय उजुरीउपर सुनुवाइ नगरी अन्तिममा दीपक भट्टको सेटिङमा नयाँ स्टक एक्सचेन्ज दर्ता गर्नका लागि बाटो खुल्ला गर्ने निर्णय गरेका थिए । जसमा सभापति चालिसे, एमाले र माओवादीका समेत केही टाठाबाठाहरुलाई दीपक भट्टले दररेट नै बुझाएको चर्चा भएको थियो ।

भारत र चीन जस्ता बिशाल अर्थतन्त्र भएका देशमा २–२ वटामात्र स्टक एक्सचेन्ज छन् । तर नेपालजस्तो सानो देशमा एउटै स्टक एक्सचेन्जलाई पर्याप्त बजार नभएको अवस्थामा अर्काे स्टकको अनुमति दिनु नहुने पक्षमा अर्थसमितिमा रास्वपाका डा. स्वर्णिम वाग्लेले नोट अफ डिसेन्ट नै लेखेका थिए ।